अन्तरजातीय विवाह गर्ने १५ जोडीलाई सम्मान , के भन्छन त सम्मानित जोडीहरुले
प्रकाशित मिति : जेष्ठ १०, २०८१ बिहीबार
अन्तरजातीय विवाह गर्ने १५ जोडीलाई मोरङमा सम्मान गरिएको छ । बेलवारीमा आयोजना गरिएको कार्यक्रममा १५ दम्पतीलाई सम्मान गरिएको हो ।
जातीय भेदभाव तथा छुवाछूत कसुर र सजाय ऐन २०६८ पारित भएको १४ वर्ष पुगेको सन्दर्भमा नेकपा माओवादी केन्द्र निकट दलित मुक्ति मोर्चाले अन्तरजातीय विवाह गर्ने जोडीलाई सम्मान गर्ने कार्यक्रम राखेको थियो ।
कार्यक्रममा माओवादी केन्द्रका उपमहासचिव एवं कोसी प्रदेस इन्चार्ज हरिबोल गजुरेलले अन्तरजातीय विवाह गर्ने १५ जोडी दम्पत्तीलाई प्रशंसापत्र सहित सम्मान गर्दै ‘अन्तरजातीय विवाह गर्ने जोडीले सामाजिक परिवर्तन र राष्ट्रिय एकतामा महत्त्वपूर्ण योगदान पुर्याउने बताउनु भयो ।
कार्यक्रममा सम्मानित जोडीहरुको तर्फबाट संविधान सभा सदस्य अनिता परियार, अरुण सुन्दास, भावना ढकाल, कविता नेपाल र सरीता बराइलीले अन्तरजातीय विवाह सम्बन्धी आफ्ना अनुभूतिहरु सुनाएउदै विवाह सजिलो नभएपनि संभव रहेको बताउनु भयो ।
अन्तरजातीय विवाह गर्ने जोडीहरुलाई समाजले सजिलै स्विकार गर्ने अबस्था अहिलेपनि नरहेको बताउदै यसकालागि सामाजिक चेतना अपरिहार्य रहेको उहाँहरुको भनाई थियो ।
गएको १४ वर्षमा देशभर जातीय विभेदका घटनामा ४६ जनाको हत्या भएको बताइएको थियो । ४६ घटनामध्ये १९ घटनामा २५ जनाको हत्या अन्तरजातीय प्रेम विवाह र विवाहको कारणबाट भएको दलित मुक्ति मोर्चाले बताएको छ ।