न्युयोर्क सिटीको ब्रोंक्समा १४ बर्षीयमाथि चक्कुप्रहार, टाइम्स स्क्वायरमा ४६ बर्षका पर्यटक घाइते
प्रकाशित मिति : बैशाख २९, २०८१ शनिबार
न्युयोर्क सिटीको टाइम्स स्क्वायर नजिकै एक पर्यटकमाथि चक्कु प्रहारको केही घण्टा अघि ब्रोंक्समा शनिबार दिउँसो एक १४ वर्षीय किशोरमाथि धेरै पटक छुरा प्रहार गरिएको छ । प्रहरीले दिउँसो साढे २ बजे घटनाबारे जानकारी पाएको थियो ।
ब्रोंक्सको हन्ट्स प्वाइन्ट एभिन्यू र ब्रुकनर बुलेभार्डको कुनामा एक १४ वर्षीय किशोर आफ्नो पिठ्युमा छुराको दुईवटा घाउको साथ तड्पेको अवस्थामा प्रहरीले फेला पारेको थियो । उनी बेहोस भने भएका थिएनन् ।
किशोरलाई हार्लेम अस्पतालमा उपचारका लागि ल्याइएको थियो, जहाँ उनको स्थिर अवस्थामा उपचार भइरहेको प्रहरीले जनाएको छ । न्युयोर्क सिटमा किशोरकिशोरीहरूको लागि रक्तपातपूर्ण हप्ता बितिरहँदा उनी पछिल्लो शिकार बनेका छन् । शंकास्पद कसैलाई पनि पक्राउ गर्न नसकेको र अनुसन्धान जारी रहेको प्रहरीले जनाएको छ ।
त्यसको चार घन्टापछि मात्रै ४६ वर्षीय पर्यटकलाई टाइम्स स्क्वायरको वेस्ट ४३ र एट्थ एभिन्यूको इन्टरसेक्शनमा अप्रत्याशित छुरा आक्रमण गरिएको थिउो । उनको छातीमा छुरा प्रहार गरिएको जनाइएको छ । ती महिलालाई स्थिर अवस्थामा बेलभ्यू अस्पतालमा लगिएको थियो ।
व्यस्त मिडटाउन क्रस स्ट्रिटबाट एउटा चक्कु बरामद गरिएको थियो । संदिग्ध आक्रमणकारीलाई हिरासतमा लिइएको छ । कुनै अभियोगहरु दायर गरिएको छैन ।
शनिबारका आक्रमणहरूले विशेष गरी न्यूयोर्क सिटीमा युवाहरूका बीचमा हिंसाको डरलाग्दो श्रृंखला थपेको छ । यस महिनाको सुरुमा मात्र दुई दिनको अवधिमा गोलीकाण्ड र छुराको आक्रमणको घटनामा कम्तिमा दुई किशोर किशोरीको मृत्यु भएको छ भने छ जना घाइते भएका छन् ।
मृतकहरूमा सोहो सडकमा गोली हानेर मारिएका १६ वर्षीय बास्केटबल प्रेमी र क्विन्स सबवे स्टेशनबाहिर घाँटीमा चक्कु प्रहार गरी हत्या गरिएको १७ वर्षीया किशोरी पनि छन्। शुक्रबार एक ११ वर्षीया बालिकाको टाउकोको पछाडिबाट एक पागल व्यक्तिले मुक्का प्रहार गरेको थियो।