१३४ जनाको क्षमतामा ३२३ बन्दी कसरी बसेका होलान ?
प्रकाशित मिति : बैशाख २६, २०८१ बुधबार
तनहुँ जिल्ला कारागारमा ३ सय २३ कैदीबन्दी छन् । दैनिकरुपमा कैदीबन्दी थपिने क्रम बढेसँगै व्यवस्थापनमा समस्या भएको कारागार प्रशासनले जनाएको छ ।
कारागारका प्रमुख नारायणप्रसाद अधिकारीका अनुसार हाल १ सय ६८ कैदी र १ सय ५५ थुनुवा गरी ३ सय २३ जना कारागारमा छन् ।
कारागारमा महिलातर्फ २० र पुरुषतर्फ १ सय १४ जनाको क्षमता रहेपनि क्षमताभन्दा बढी कैदीबन्दी व्यवस्थापन गर्नुपरेको छ ।
कारागारमा कर्तव्य ज्यानका ४८, ज्यान मार्ने उद्योगका दश, सवारी ज्यानका २३, चोरीका ३२, बहुविवाहका पाँच, लागुऔषधका ६९, डाकाचोरीका १३, ठगीका तीन, मानव बेचबिखनका चार, जबर्जस्ती करणीका ९०, जबर्जस्ती करणी उद्योगका सात, अपहरणका तीन, भ्रष्टाचारका एक, हातहतियार खरखजानाका चार र अन्य नखुलेका ११ कैदीबन्दी छन् ।