न्युयोर्कमा यो सिजनमा २ लाख १० हजार हरिणको शिकार, यसकारण सरकारले गर्छ प्रोत्साहन
प्रकाशित मिति : बैशाख २४, २०८१ सोमबार
न्युयोर्क राज्यको वातावरण संरक्षण विभागले यो सिजनमा न्युयोर्कमा शिकारीहरुले २ लाख १० हजार हरिणको शिकार गरेको घोषणा गरेको छ । न्युयोर्कमा हरिणको शिकार गर्ने सिजन सामान्यतया नोभेम्बरमा सुरु भएर जनवरीमा समाप्त हुन्छ । यसपटकको सिजनमा शिकारीहरुले सन् १९९० को दशको तुलनामा दोब्बर संख्यामा साढे २ बर्ष वा सोभन्दा बढी उमेरका हरिणको शिकार गरेको जनाइएको छ ।
यसपटकको सिजनमा शिकारीहरुले शिकार गरेका ७० प्रतिशतभन्दा धेरै हरिण साढे २ बर्ष वा सोभन्दा बढी उमेरका रहेको न्युयोर्क राज्यको वातावरण संरक्षण विभागले जनाएको छ । यसलाई बच्चाहरुलाई छाडिदिने र हुर्कन दिने अभियानको सफलताका रुपमा हेरिएको छ ।
यो सिजनमा शिकार गरिएकामध्ये अनुमानित १ लाख १२ हजार २ सय २४ भाले हरिणहरु थिए भने ९७ हजार ५ सय ५७ सिंग नभएका पोथी हरिणहरु थिए । गतबर्षको तुलनामा भाले हरिणको शिकारमा ३ दशमलव ६ प्रतिशत र सिंग नभएका पोथी हरिणको शिकारमा १५ दशमलव ६ प्रतिशतले गिरावट आएको छ ।
सिङ नभएका पोथी हरिणको शिकारमा पाँच वर्षको औसत भन्दा लगभग १५ प्रतिशत कमी आएको छ । न्युयोर्कको वातावरण संरक्षण विभागले हरिणको संख्या बढ्न नदिन र संख्या कम गर्न पोथी हरिणको शिकारलाई प्रोत्साहन गर्दै आएको छ ।
सिङ नभएको हरिणको शिकारले हरिणको संख्या उपलब्ध बासस्थानसँग सन्तुलनमा रहन र सार्वजनिक स्वीकृतिको स्तर भन्दा बढि हुन नदिन मद्दत गर्दछ । हरिणको संख्या बढ्दा बालीमा क्षति, गाडीसँग ठोक्किने समस्यामा बृछि र अन्य सम्भावित नकारात्मक प्रभावहरू निम्त्याउन सक्छ।
राज्यका केही क्षेत्रहरू विशेष गरी वन्यजन्तु व्यवस्थापन एकाइहरूमा शिकारीहरूले हरिणको संख्यालाई प्रभावकारी रूपमा व्यवस्थापन हुने गरी पर्याप्त संख्यामा सिंग नभएका हरिणको शिकार नगरेको जनाइएको छ । राज्य सरकारले आगामी सिजनहरुमा सिंग नभएका हरिणको शिकार बढाउन विभिन्न नियामक र गैरनियामक विकल्पहरूको मूल्याङ्कन गरिरहेको जनाएको छ । सबै शिकारीहरूलाई आगामी सिजनमा कम्तिमा एउटा सिङ नभएको हरिण शिकार गर्न प्रोत्साहन गरिएको छ ।
न्युयोर्कमा हरिणको शिकारको डाटा दुई मुख्य स्रोतहरूबाट जम्मा गरिएको छ । सबै सफल शिकारीहरूको शिकार गरेको सात दिन भित्र रिपोर्ट गर्नुपर्छ भने वातावरण संरक्षण विभागले राज्यका मासु प्रोसेसरहरू र चेक स्टेशनहरूमा काटिएका हरिणको डाटा संकलन गर्छ ।
न्युयोर्कमा हरिण र भालुको शिकार सूर्योदय हुनुभन्दा ३० मिनेट अगाडिदेखि सूर्यास्त भएको ३० मिनेटसम्म गर्न सकिन्छ । बन्दुकको साथ हिरण वा भालुको शिकार गर्दा शिकारीहरूले फ्लोरोसेन्ट सुन्तला वा फ्लोरोसेन्ट गुलाबी टोपी वा भेस्ट लगाउनुपर्छ। शिकारमा भाग लिन स्थानीय कानून पारित गरेका काउन्टीहरुमा १२ र १३ वर्षका शिकारीहरूले बन्दुक वा भालाको साथ हरिणको मात्र शिकार गर्न पाउँछन् । उनीहरुले भालुको शिकार गर्न भने पाउँदैनन् ।
न्युयोर्कमा ६ हजार देखि ७ हजार कालो भालुहरू जंगलमा छन्। हालका वर्षहरूमा संख्या बढेको छ भने राज्यभरि व्यापक रूपमा विस्तार भएका छन् । भालुको शिकार भालुको संख्या नियन्त्रण गर्न प्राथमिक व्यवस्थापन तरिका हो। न्युयोर्कका उत्तरी, दक्षिणपूर्वी र मध्यपश्चिमी सबै भागहरूमा शरद ऋतुमा भालुको शिकार गर्न अनुमति दिइएको छ।