प्रमुख विकास साझेदार जापानका परराष्ट्रमन्त्रीले आगामी साता नेपाल भ्रमण गर्ने
प्रकाशित मिति : बैशाख १६, २०८१ आईतबार
जापानका परराष्ट्रमन्त्रीले आगामी साता नेपालको भ्रमण गर्नुहुने भएको छ । जापानको परराष्ट्र मन्त्रालयले शनिबार परराष्ट्रमन्त्री याको कामीकावाको भ्रमण घोषणा गरेको हो ।
“परराष्ट्रमन्त्री कामिकावाले यही वैशाख १४ देखि २४ गतेसम्म मदगास्कर, आइभोरी कोस्ट, नाइजेरिया, फ्रान्स, श्रीलङ्का र नेपालको भ्रमण गर्नेहुनेछ”, परराष्ट्र मन्त्रालयले घोषणा गरेको छ ।
६ राष्ट्रको भ्रमणमा निस्कुनअघि परराष्ट्रमन्त्री कामिकावाले एक पत्रकार सम्मेलनमा ‘ग्लोबल साउथ’ र सात राष्ट्रहरूको समूहलगायत समान विचारधारा भएका देशहरूबीच सम्बन्ध विस्तारमा सेतुको रूपमा काम गर्ने बताउनुभएको थियो ।
नेपाल जापान सम्बन्ध अठारौं शताब्दीको अन्त्यतिरको हो। ०१ सेप्टेम्बर १९५६ मा कूटनीतिक सम्बन्ध स्थापनासँगै यो सम्बन्ध औपचारिक बन्यो। दुई देशबीचको सम्बन्ध मित्रता, सद्भावना र सहयोगले चिनिएको छ।
नेपालले सन् १९६५ मा टोकियोमा आफ्नो दूतावास स्थापना गरेको थियो भने जापानले १९६७ मा काठमाडौंमा आफ्नो दूतावास स्थापना गरेको थियो । नेपालको ओसाकामा मानार्थ महावाणिज्य दूतावास छ । जापान नेपालको लामो समयदेखिको मित्र र प्रमुख विकास साझेदार हो । जापानमा बसोबास गर्ने नेपालीको संख्या करिव १ लाख रहेको अनुमान छ । नेपाली समुदाय जापानमा सातौं ठूलो विदेशी समुदाय हो ।
हरेक वर्ष हजारौं नेपाली विद्यार्थी उच्च शिक्षा र जापानी भाषा अध्ययन गर्न जापान जाने गर्छन् । नेपाली विद्यार्थीको विदेश अध्ययनका लागि जापान दोस्रो सबैभन्दा मनपर्ने गन्तव्य हो ।
जापान नेपालको एक महत्वपूर्ण व्यापारिक साझेदार हो । जापानमा नेपालको प्रमुख निर्यातमा पश्मिना उत्पादन, तयारी पोशाक, ऊनी सामान, गलैंचा, हस्तशिल्प, नेपाली कागज तथा कागजका सामान, छालाका सामान, चाँदीका भाँडा र गहनाहरू जापानमा पर्छन् ।
त्यसैगरी जापानबाट नेपालको प्रमुख आयातमा सवारी साधन तथा पार्टपुर्जा, इलेक्ट्रोनिक सामान, मेसिनरी तथा उपकरण, फलाम तथा स्टिलका उत्पादन, फोटोग्राफिक सामान, चिकित्सा उपकरण र कपडा पर्दछन् ।
जापानी उत्पादन प्रक्रिया ल्याई वा जापानमा उत्कृष्ट कच्चा पदार्थ निकासी गरी उत्पादन विकासलाई एकीकृत गरी व्यापार क्षेत्रमा सहकार्यको प्रशस्त अवसर छ ।