इजरायलमाथी इरानको पहिलो प्रत्यक्ष हमला , घातक ड्रोन र मिसाइल प्रहार , इजरायलको सुरक्षाप्रति प्रतिबद्ध रहेको अमेरिकाको भनाई
प्रकाशित मिति : बैशाख १, २०८१ शनिबार
इरानले इजरायलमा पहिलो पटक प्रत्यक्ष हमला गरेको छ । शनिबार राति इरानले इजरायलमा २०० भन्दा बढी घातक ड्रोन र मिसाइल आक्रमण गरेको इजरायली डिफेन्स फोर्स आइडिएफले जनाएको छ । आक्रमण सुरु गरेदेखि नै इजरायलमा तनावको स्थिति छ ।
आक्रमणबाट सैनिक आधारशिविरमा सामान्य क्षति भएको आइडिएफले जनाएको छ । त्यस्तै ७ वर्षीया बालिका गम्भीर घाइते भएकी छन् । टाउको चोट लागेपछि उनलाई अस्पताल लगिएको छ । अन्य ३१ जना मानिसहरू पनि सामान्य घाइते भएको अन्तर्राष्ट्रिय सञ्चारमाध्यमहरूले जनाएका छन् ।
इरानले प्रहार गरेका केही ड्रोनलाई इजरायलले र केहीलाई अमेरिकी सेनाले निष्कृय पारेका छन् । अझै पनि केही ड्रोनहरु इजरायलका आकाशमा उडिरहेको देखेको र ती केही घण्टामै इजरायलसम्म आइपुग्न सक्ने इजरायली सेनाले जनाएको छ ।
इजरायलमाथि इरानले पहिलो पटक प्रत्यक्ष हमला गरेको समाचार संस्था रोयटर्सले जनाएको छ। इरानी सेनाले विज्ञप्ति जारी गर्दै इजरायलको ‘निरन्तर अपराध’विरुद्ध आक्रमण गरिएको बताएको छ। एक महिनाअघि सिरियास्थित इरानी दूतावासमा आक्रमण हुँदा त्यहाँ इरानी कुड्स फोर्सका वरिष्ठ कमाण्डर र सैन्य अधिकारीसहित १३ जना मारिएका थिए ।
उक्त आक्रमणको जिम्मा इजरायलले लिएको थिएन । तरपनि हमलाका पछाडि इसराइलको हात रहेको दाबी गर्दै इरानले कडा जवाफ दिने बताएको थियो ।
इरानले इजरायलमा आक्रमण गर्ने भनेपछि संयुक्त राज्य अमेरिकाले इजरायललाई आफ्नो पूर्ण समर्थन हुने र उसलाई जोगाउन आफू ढाल भएर उभिने प्रतिबद्धता व्यक्त गर्दै इरानलाई चेतावनी दिएपनि इरानले भने हमला गरेको छ ।
इरानले जवाफी हमला गरेको छैन । इरानले हमला गरेपछि मध्यपुर्बमा ठुलो युद्धको जोखिम बढाएको बिश्लेषकहरुले बताएका छन । अमेरिका , बेलायत , क्यानडा लगाएतका देशहरुले हमलाको बिरोध गरेका छन । अरब देशहरुले भने संयमता अपनाउन आग्रह गरेका छन ।
इरानले इजरायलमा गरेको आक्रमणलाई ध्यानमा राख्दै अमेरिकी राष्ट्रपति जो बाइडेनले ह्वाइट हाउसमा भेटवार्ता गर्नुभएको छ । ह्वाइट हाउसले इरानले अबको केही घण्टामा इजरायलविरुद्ध थप हवाई हमला गर्न सक्ने जनाएको छ । अमेरिकी राष्ट्रपतिले बाइडेनले भन्नुभएको छ , ‘हामी इरानको धम्कीविरुद्ध इजरायलको सुरक्षाप्रति प्रतिबद्ध छौँ र यसका लागि दृढताका साथ उभिन्छौँ।’