इजरायली अर्बपतिको स्वामित्वमा रहेको जहाज इरानको कब्जामा, जहाजमा १७ भारतीयहरु
प्रकाशित मिति : बैशाख १, २०८१ शनिबार
१७ भारतीय चढेको इजरायली अर्बपतिको स्वामित्वमा रहेको कार्गो जहाज इरानले स्ट्रेट अफ हर्मुजमा नियन्त्रणमा लिएको छ । इरानको इस्लामिक रिभोलुसनरी गार्ड्स कोर (आईआरजीसी) ले लन्डनस्थित कम्पनी जोडियाक मेरिटाइमको पोचुगिज ध्वजावाहक एमएससी एरिज जहाज कब्जा गरेको हो । कम्पनी इजरायली अर्बपति इयाल अफरको स्वामित्वमा रहेको जनाइएको छ ।
मध्यपूर्वमा बढ्दो तनाव र जारी द्वन्द्वका बीच इरानले जहाज कब्जा गरेको हो। इरानले अप्रिल १ मा सिरियाको राजधानी दमास्कसमा देशको कूटनीतिक नियोगमा भएको हवाई हमलामा शीर्ष जनरलको हत्या गरेकोमा इजरायललाई सजाय दिने चेतावनी दिएको छ ।
नरेन्द्र मोदी सरकारले कब्जामा लिएको जहाजमा रहेका भारतीय नागरिकका सम्बन्धमा कूटनीतिक माध्यमबाट इरान सरकारसँग सम्पर्कमा रहेको आधिकारिक स्रोतले जनाएको छ । जहाजमा कुल २५ जना रहको थिए ।
इरानको वाणिज्य दूतावासमा इजरायलले गरेको घातक हमलापछि इरानले इजरायल भित्रका धेरै स्थानमा हमला गर्ने योजना बनाएको अमेरिकाको दावी रहेको छ । केही दिनदेखि, इरानी अधिकारीहरू र सर्वोच्च नेता अयातोल्लाह अली खामेनी लगायतले सिरिया आक्रमणको लागि इजरायललाई थप्पड दिने धम्की दिइरहेका छन्। पश्चिमी सरकारहरूले यस क्षेत्रका आफ्ना नागरिकहरूलाई आक्रमणका लागि तयार रहन चेतावनी दिएका छन्।
यद्यपि विगतमा इरानले आफ्ना आणविक वैज्ञानिकहरूको लक्षित हत्या र इरानका आणविक साइटहरू विरुद्ध धेरै तोडफोड अभियानहरूका बाबजुत इजरायलमा प्रत्यक्ष रूपमा आक्रमण गरेको थिएन । यद्यपि इरानले दशकौंदेखि इजरायली वा यहूदी सम्बन्धित साइटहरूलाई प्रोक्सी बलहरू मार्फत लक्षित गर्दै आएको छ।