Follow @khasokhasmag

नेपालीको लगानीमा कतारमा मेडिकल सेन्टर, निशुल्क स्वास्थ्य शिविरको योजना


प्रकाशित मिति : भाद्र १२, २०७४ सोमबार

कतारका सफल व्यवसायी राजेन्द्र कुमार शर्मा (आरके शर्मा) र विकाश प्रसाईको लगानीमा कतारको दोहामा मेडिकल सेन्टरको स्थापना गरिएको छ । नेपालीको लगानीमा मध्यपूर्वमा खोलिएको सम्भवत यो नै पहिलो मेडिकल सेन्टर हो ।

नेपालीहरुलाई लक्षित गरी स्थापना गरिएको यो मेडिकल सेन्टरबाट कतारमा रहेका नेपालीहरुले भाषाको कुनै समस्या विना नै उपचार गर्न पाउने अपेक्षा गरिएको छ । कतारमा धेरै नेपालीहरुको समयमा स्वास्थ्य परिक्षण र जनचेतनाको अभावमा  अकालमा ज्यानै समेत जाने गरेको छ । कतारमा झण्डै पाँच लाख नेपालीहरु रहेका छन् ।

‘कान्तिपुर मेडिकल सेन्टर’को नाममा स्थापित यो मेडिकल सेन्टरको कतारका लागि नेपाली राजदूत प्राडा रमेश कोइरालाले उद्घाटन गर्नुभयो । मेडिकल सेन्टरमा उपचारका लागि चारजना प्रतिष्ठित नेपाली डाक्टरहरु कार्यरत छन् । उनीहरुमध्ये एकजना छाला तथा यौनरोग, एकजना इन्टरनल मेडिसिन, एकजना मुटुका र एकजना दन्त विशेषज्ञ रहेका छन् ।

मेडिकल सेन्टरको स्पोन्सरको रुपमा कतारी नागरिकहरु मोहमद खालिद अल–खत्तर अध्यक्ष र इस्सा अल कुवारी उपाध्यक्ष छन् । बारुवा सेन्टरको छेउमा एन खालिद रोडमा रहेको मेडिकल सेन्टरमा सेवाग्राहीहरुले नेपाली डाक्टरबाटै नेपाली भाषामा समस्या अवगत गराएर उपचार गर्न सक्ने आरके शर्माले खसोखासलाई जानकारी दिनुभयो ।

आगामी दिनमा नेपाली दूतावाससँग मिलेर कतारमा रहेका नेपालीमाझ स्वास्थ्य जागरण अभियान र निशुल्क स्वास्थ्य शिविर समेत संचालन गर्ने योजना रहेको समेत शर्माले जानकारी दिनुभयो ।

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com