साउदी अरबमा ५१४ नेपालीले ज्यान गुमाए , अरु देशको अबस्था पनि कम छैन
प्रकाशित मिति : चैत्र १९, २०८० सोमबार
विदेशमा काम गर्ने क्रममा ज्यान गुमाउने श्रमिकको सङ्ख्या बर्षेनी बढिरहेको देखिएको छ । पछिल्लो ८ महिनामा १ हजार २५५ युवाले विदेशी भूमिमा ज्यान गुमाउनु परेको देखिएको छ । जुन अघिल्लो आर्थिक बर्ष २०७९।८० को सोही अबधिको तुलनामा ४७ ले बढि हो । अघिल्लो बर्ष १ हजार २०८ जनाले रोजगारीको सिलसिलामा बिदेशी भूमीमा ज्यान गुमाएका थिए ।
बैदेशिक रोजगार विभागका अनुसार, चालु आर्थिक बर्ष २०८०। ८१ को साउनदेखि फागुनसम्मको ८ महिनाको अवधिमा श्रम स्वीकृति लिई ४ लाख ७१ हजार २१० जना नेपाली वैदेशिक रोजगारीमा गएका छन् । चालु आर्थिक बर्ष शुरु भएपछि दैनिक औसतमा १ हजार ९६३ जनाभन्दा बढी वैदेशिक रोजगारीमा गएको देखिन्छ ।
बैदेशिक रोजगार बोर्डका अनुसार यो तथ्याङक सहायता दावी गर्नेहरुको मात्र हो । यो भन्दा धेरै सख्या हुनसक्ने बोर्ड कै अधिकारीले बताउछन ।
श्रम स्वीकृति लिएर बैदेशिक रोजगारीमा जाने कामदारको मृत्यु भएमा सचिवालयबाट ७ लाख रुपैया परिवारले प्राप्त गर्ने गर्दछन । तर बिभिन्न भिषामा बिदेशमा गएर काम गर्नेक्रममा ज्यान गुमाउनेको संख्या पनि कम छैन ।
तथ्यांक अनुसार वैदेशिक रोजगारीका लागि दैनिक औसतमा १ हजार ९०० भन्दा बढी श्रम स्वीकृति लिएर जाने गरेका छन । तथ्याङकले दैनिक ५ जनाको शव नेपालको अन्तर्राष्ट्रिय त्रिभुवन विमानस्थलमा आइपुग्ने गरेको देखाउछन । पर्याप्त तालिम, सिप र सुरक्षाको ग्यारेन्टीविनै वैदेशिक रोजगारीमा जाँदा र पठाउँदा ठूलो सङ्ख्यामा नेपाली श्रमिकको मृत्यु हुने गरेको देखिन्छ ।
साउदी अरबबाट ५१४, मलेसियाबाट ३३३, कतारबाट १२३ र संयुक्त अरब इमिरेट्स यूएई बाट ८२ जना नेपालीको शव नेपाल ल्याइएको बोर्डको पछिल्लो आठ महिनाको तथ्याङकमा उल्लेख छ ।
गत आर्थिक बर्ष २०७९।८० मा ७ लाख ७१ हजार ३२७ जना नेपाली वैदेशिक रोजगार विभागबाट श्रम स्वीकृति लिएर विदेशिएका थिए । त्यो वर्ष औसतमा दैनिक २ हजार ११३ जनाभन्दा बढी नेपाली वैदेशिक रोजगारीमा गएको देखिन्छ ।