विश्वमा सबैभन्दा खुशी फिनल्याण्डका नागरिक, नेपाली ९३ औ नम्बरमा, विगतको तुलनामा दुःखी
प्रकाशित मिति : चैत्र ७, २०८० बुधबार
मार्च २० अर्थात् अन्तर्राष्ट्रिय खुशी दिवसका अवशरमा विश्वका खुसी देशबारे सन् २०२४ को ग्यालप वर्ल्ड रिपोर्ट रिपोर्ट सार्वजनिक गरिएको छ । जसले आफै रिपोर्ट गरिएको खुशीको स्तरको आधारमा देशहरूको वर्गीकरण गर्दछ । जस अनुशार फिनल्याण्ड लगातार सातौं वर्षको लागि विश्वको सबैभन्दा खुशी देश घोषित भएको छ भने फिनल्याण्डको स्कोर ७ दशमलव ७४१ रहेको छ ।
नेपाल सुचीमा ९३ औं नम्बरमा रहेको छ भने स्कोर ५ दशमलव १५८ रहेको छ । सन् २००६ देखि २०१० को तुलनामा सन् २०२१ देखि २०२३ मा नेपालीहरु बढी दुखी देखिएका छन् । सबैभन्दा दुखी अफगानिस्तान रहेको छ, जसको स्कोर १ दशमलव ७२१ रहेको छ । सुचीमा इन्डिया १२६ नम्बरमा छ भने चीन ६० नम्बरमा रहेको छ ।
खुशी देशहरुको टपटेनमा क्रमशः फिनल्याण्ड, डेनमार्क, आइसल्याण्ड, स्वीडेन, इजरायल, नेदरल्याण्डस, नर्वे, लक्जेम्बर्ग, स्वीट्जरल्याण्ड र अष्ट्रेलिया रहेका छन् । बेलायत २० र अमेरिका २३ नम्बरमा परेका छन् ।
निष्कर्षमा पुग्न वैज्ञानिकहरूले गत तीन वर्षहरूमा ग्यालप वर्ल्ड पोलमा भाग लिएका १४३ राष्ट्रका मानिसहरूबाट प्राप्त सर्वेक्षण प्रतिक्रियाहरू जाँच गरेका थिए । बासिन्दाहरूलाई उनीहरूको जीवन सन्तुष्टिलाई शून्य देखि १० को स्केलमा मूल्याङ्कन गर्न सोधिएको थियो, उनीहरूको जवाफले देशको श्रेणी निर्धारण गर्दछ। त्यसपछि विशेषज्ञहरूले औषत आयु, उदारता, जीडीपी जस्ता कारकहरूको विश्लेषण गरेका थिए ।
यस वर्ष पहिलो पटक रिपोर्टले उमेर समूहहरूमा खुशी, स्वास्थ्य वा समृद्धी कसरी फरक हुन्छ भन्ने कुरामा पनि ध्यान केन्द्रित गरेको छ। ती खोजहरूको आधारमा छुट्टाछुट्टै सूचीहरू सिर्जना गरिएको थियो । उदाहरणका लागि लिथुआनिया ३० वर्ष मुनिका मानिसहरूमा खुशीको लागि नम्बर १ मा आयो, तर समग्रमा १९ औं स्थानमा थियो।
नेपाल ३० बर्ष मुनिका मानिसहरुमा खुशीका लागि पनि ९२ नम्बरमा छ तर ६० बर्ष माथिकाहरुका लागि भने ७६ नम्बरमा रहेको छ । ३० देखि ४५ बर्षसम्मका उमेरका व्यक्तिका लागि नेपाल खुशीमा १०१ नम्बरमा छ भने ४५ देखि ६० बर्षसम्मका व्यक्तिका लागि ७६ नम्बरमा छ । विश्लेषकहरूले ती प्रवृत्तिहरूमा परिवर्तनहरू निर्धारण गर्न सन् २००६ सम्मको तथ्यांकसम्म गएका थिए ।
कभर फोटो : आयुस शाक्य