अमेरिकामा टिकटकमा प्रतिबन्ध लगाउन सक्ने बिलमा आज प्रतिनिधिसभामा मतदान हुँदै
प्रकाशित मिति : फाल्गुन ३०, २०८० बुधबार
अमेरिकामा टिकटकमा प्रतिबन्ध लगाउन सक्ने बिलमा आज प्रतिनिधिसभामा मतदान हुँदैछ । ह्वाइट हाउसको समर्थन प्राप्त भइसकेको यो बिल प्रतिनिधिसभाबाट पारित भइहाले पनि सिनेटबाट पारित हुने नहुने निश्चित छैन । विगतमा टिकटकमा प्रतिबन्ध लगाउनुपर्ने पक्षमा उभिएका पूर्व राष्ट्रपति डोनाल्ड ट्रम्प अहिले टिकटकमा प्रतिबन्ध लगाउन नहुने बताउन थालेका छन् । चीनले टिकटकमाथि प्रतिबन्ध लागेका मेरिकालाई असर गर्ने बताएको छ ।
अमेरिकी संसदको प्रतिनिधिसभाको एक शक्तिशाली समितिले टिकटकमाथि प्रतिबन्ध लगाउनसक्ने बिल सर्वसम्मतले अनुमोदन गरेपछि यो संसदमा मतदानका लागि अगाडि बढेको हो । बिल दुबै सदनबाट पारित भएमा अमेरिकामा टिकटकमा प्रतिबन्ध लगाउन सक्छ । टिकटकले चिनियाँ सरकारको जासुसी जोखिम निम्त्याउन सक्ने डरका कारण उर्जा र ब्यापारबारेको समितिले यो बिल अगाडि बढाएको हो ।
बिलमा चीनको बाइटडान्सलाई भिडियो एप टिकटकबाट अलग हुन वा अमेरिकी प्रतिबन्धको सामना गर्न झण्डै साढे ५ महिना दिने प्रावधान रहेको छ । अब बिलमाथि प्रतिनिधिसभामा मतदान हुने भएको छ, जुन टिकटकमाथि अमेरिकी कारवाहीका लागि पहिलो महत्त्वपूर्ण कदम हो । टिकटकका लगभग १७० मिलियन अमेरिकी प्रयोगकर्ताहरू छन्।
रिपब्लिकन सांसद माइक गालाघर र डेमोक्रेटिक सांसद राजा कृष्णमूर्तिले मंगलबार एपको चिनियाँ स्वामित्वले उत्पन्न गरेको राष्ट्रिय सुरक्षा चिन्तालाई सम्बोधन गर्न बिल पेश गरेका थिए । माइक गालाघरले यो टिकटकमाथिको प्रतिबन्ध नभई ट्युमर हटाउन र यस प्रक्रियामा बिरामीलाई बचाउनको लागि डिजाइन गरिएको शल्यक्रिया भएको बताए । बिलले बाइटडान्सलाई टिकटक छाड्न १६५ दिन समय दिनेछ । यदि त्यसो नभएमा अमेरिकामा टिकटकमा प्रतिबन्ध लाग्नेछ ।
टिकटकका प्रवक्ताले भने यो बिल टिकटकमाथिको सिधा प्रतिबन्ध भएका बताएका छन् । यो बिलले १७० मिलियन अमेरिकीहरूलाई संविधानको पहिलो संशोधनबाट प्रदान गरिएको अधिकारलाई कुल्चिने र ५ मिलियन साना व्यवसायहरूलाई प्लेटफर्मबाट वञ्चित गर्ने प्रवक्ताको भनाई छ । ह्वाइट हाउसका प्रेस सेक्रेटरी करिन जीन पियरले भने संसदमा ल्याइएको बिलको प्रशंसा गरेकी छिन् । उनले यो बिल राष्ट्रपतिको डेस्कमा पुगेको देख्न चाहेको बताएकी छिन् भने बाइडेनले आफूले यसमा हस्ताक्षर गर्ने बताएका छन् ।
टिकटक एप अमेरिकामा लोकप्रिय छ र चुनावी वर्षमा यो बिल स्वीकृत गर्न गाह्रो हुन सक्छ। गत महिना डेमोक्र्याटिक राष्ट्रपति जो बाइडेनको चुनाव अभियान समेत टिकटकमा सामेल भएको थियो । नोभेम्बरको अन्त्यमा एक अमेरिकी न्यायाधीशले मोन्टानामा टिकटकमा लगाइएको राज्यको प्रतिबन्धमा रोक लगाएका थिए । यसले प्रयोगकर्ताहरूको स्वतन्त्र अभिव्यक्ति अधिकारको उल्लङ्घन गरेको भन्दै अदालतले रोक लगाएको थियो ।
यसैबीच टिकटकले अमेरिकी प्रयोगकर्ताहरूलाई नोटिफिकेशन पठाउँदै अमेरिकी संसदले टिकटकमाथि पूर्ण प्रतिबन्ध लगाउने योजना बनाइरहेको र त्यसले १७० मिलियन अमेरिकीको अभिव्यक्ति स्वतन्त्रताको संवैधानिक अधिकार खोस्ने उल्लेख गरेको थियो । प्रतिबन्धले लाखौं व्यवसायलाई नोक्सान गर्ने र देशभरका अनगिन्ती सर्जकहरुको जीविकोपार्जनलाई नष्ट गर्ने नोटिफिकेशनमा जनाइएको थियो । अलर्टमा प्रयोगकर्ताहरूलाई उनीहरूका क्षेत्रका सांसदको कार्यालयमा फोन गरेर दवाव दिन सुझाव दिइएको थियो ।