ग्रिनकार्डहुनेका दम्पत्ति र बच्चाको भिसा प्रतिक्षा अवधि ३ महिना कम, अर्को महिना ६ महिना घट्नसक्ने
प्रकाशित मिति : फाल्गुन २८, २०८० सोमबार
अमेरिकी विदेश मन्त्रालय ब्यूरो अफ कन्सुलर अफेयर्सबाट प्रकाशित अप्रिलको भिसा बुलेटिनले ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका अनुहारमा थोरै चमक ल्याएको छ । अब अमेरिकाबाहिर हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले दूतावासमा भिसा अन्तरवार्ताका लागि प्रतिक्षा गर्नुपर्ने अवधि झण्डै ३ बर्ष ६ महिनामा झरेको छ । अर्थात् सन् २०२० को सेप्टेम्बर ८ भन्दा अगाडि प्राथमिकता मिति भएकाहरुले आगामी अप्रिलमा आप्रवासी भिसाका लागि अन्तरवार्ताको मिति पाउन सक्नेछन् । जनवरीमा यो अवधि झण्डै ४ बर्ष २ महिना रहेकोमा फेब्रुअरीमा झण्डै ४ बर्ष र मार्चमा ३ बर्ष ८ महिनामा झरेको थियो ।
अमेरिकी नागरिकका विवाहित छोराछोरीहरुले दूतावासमा भिसा अन्तरवार्ताका लागि प्रतिक्षा गर्नुपर्ने अवधि भने मार्चको तुलनामा अप्रिलमा टसमस भएको छैन । पनि मार्चमा झण्डै ५ महिना कम भएको छ । अर्थात् १ अक्टोबर २००९ भन्दा अगाडि प्राथमिकता मिति भएकाहरुले अब मार्चमा आप्रवासी भिसाका लागि अन्तरवार्ताको मिति पाउन सक्नेछन् । फेब्रुअरीमा २२ अप्रिल २००९ भन्दा अगाडि प्राथमिकता मिति भएकाहरुलेमात्र भिसा अन्तरवार्ता पाउन सफल भएका थिए ।
परिवारमा आधारित अरु कुनै पनि श्रेणीमा ग्रिनकार्ड वा आप्रवासी भिसा पाउन लाग्ने अवधि टसमस भएको छैन । अप्रिलमा अमेरिकी नागरिकका २१ बर्ष काटेका अविवाहित छोराछोरीहरुले भिसा पाउन ८ फेब्रुअरी २०१५ भन्दा अगाडि प्राथमिकता मिति भएको हुनुपर्छ भने ग्रिनकार्डवाहकका विवाहित छोराछोरीहरुका सन्दर्भमा २२ नोभेम्बर २०१५ भन्दा अगाडि प्राथमिकता मिति भएकाहरुले अब अप्रिलमा आप्रवासी भिसाका लागि अन्तरवार्ताको मिति पाउन सक्नेछन् । अमेरिकी नागरिकका दाजुभाई दिदीबहिनीका सन्दर्भमा ८ जुन २००७ भन्दा अगाडि प्राथमिकता मिति भएकाहरुले अप्रिलमा आप्रवासी भिसाका लागि अन्तरवार्ताको मिति पाउन सक्नेछन् ।
अमेरिकाभित्रै हुनेहरुका सन्दर्भमा ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका लागि गत अगस्तसम्म ग्रिनकार्ड फाइल गर्ने मिति करेन्ट रहदै आएकोमा सेप्टेम्बरदेखि भने करेन्ट छैन । अथात् सेप्टेम्बरदेखि अमेरिकाभित्रै हुने ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुले आई १३० पिटिसन र ग्रिनकार्ड आवेदन आई ४८५ एकसाथ फाइल गर्न पाउँदैनन् ।
सेप्टेम्बर १, २०२३ को प्राथमिकता मितिमा अहिलेसम्म टसमस नभएकाले सेप्टेम्बर १ पछि आई १३० पिटिसन दिएकाहरुले उक्त पिटिसन विचाराधिन भएकै अवस्थामा अहिलेसम्म पनि ग्रिनकार्ड आवेदन आई ४८५ आवेदन दिन पाएका छैनन् । जसले गर्दा उनीहरुलाई आफ्नो भिसा वा अध्यागमन स्टाटस जोगाउने झन्झट भएको छ । सेप्टेम्बर १ अगाडि आई १३० पिटिसन दिएकाहरुले भने सेप्टेम्बरदेखि नै ग्रिनकार्ड आवेदन आई ४८५ पेश गर्न पाइरहेका छन् । आई ४८५ पेश गरिसकेपछि भिसा वा अध्यागमन स्टाटस जोगाउने झन्झट नहुनसक्छ । अमेरिकाभित्र हुने परिवारमा आधारित अन्य श्रेणीका ग्रिनकार्डका लागि पनि ग्रिनकार्ड फाइल गर्ने प्राथमिकता मिति मार्चको तुलनामा अप्रिलमा टसमस भएको छैन ।
यसैबीच अप्रिलको भिसा बुलेटिनमा परिवारमा आधारित ग्रिनकार्डका सन्दर्भमा भिसा उपलब्धता मितिबारे पूर्वानुमान समेत गरिएको छ । जस अनुशार अमेरिकी नागरिकका २१ बर्ष काटेका अविवाहित छोराछोरीहरुका सन्दर्भमा तीनमहिनासम्म, ग्रिनकार्डवाहकका दम्पत्ति र २१ बर्षभन्दा कम उमेरका छोराछोरीहरुका सन्दर्भमा ६ महिनासम्म, ग्रिनकार्डवाहकका २१ बर्ष काटेका अविवाहित छोराछोरीका सन्दर्भमा १० हप्तासम्म, अमेरिकी नागरिकका विवाहित छोराछोरीहरुका सन्दर्भमा केही महिनासम्म र अमेरिकी नागरिकका दाजु भाई दिदीबहिनीहरुका सन्दर्भमा ४ हप्तासम्म भिसा पाउन लाग्ने अवधिमा कमी आउनसक्ने भिसा बुलेटिनमा अनुमान गरिएको छ । यो क्रम आर्थिक बर्ष २०२४ को तेश्रो वा चौथो क्वार्टरसम्म पनि जान सक्नेछ । रोजगारमा आधारित ग्रिनकार्डका सन्दर्भमा भने अर्को महिना कममात्र टसमस हुने देखिएको छ ।