न्युयोर्क सिटीमा ट्रेनको लिकमा मान्छेको खुट्टा भेटिएको घटना अपराधसँग सम्बन्धित नरहेको अनुमान


प्रकाशित मिति : फाल्गुन ८, २०८० मंगलबार

न्युयोर्क सिटीमा ट्रेनको लिकमा मानव खुट्टा भेटिएको घटना अपराधसँग सम्बन्धित नभएको अनुमान गरिएको छ । शनिबार ब्रोंक्समा ४ नम्बर ट्रेनको लिकमा मान्छेको खुट्टा भेटिएपछि त्यसबारे अनुसन्धन सुरु गरिएको थियो ।

उक्त खुट्टा दिउँसो १ बजेतिर १६७ औं र १७० औं स्ट्रीटको बीचमा फेला परेको थियो । एक रेल कन्डक्टरले बिहानको हिमआँधीपछि सफा गरिरहेका बेला लिकमा खुट्टा देखेका थिए । खुट्टा मेडिकल परीक्षकलाई हस्तान्तरण गरिएको थियो ।

उक्त मानव खुट्टा कैयन माइलसम्म घिसारिएर त्यहाँ आइपुगेको र धेरै दिनसम्म फेला नपरेको अधिकारीहरुको विश्वास रहेको छ । यो केही माइल टाढा केही दिन अघि रेलले ठक्कर दिएको व्यक्तिबाट अलग भएको खुट्टा रहेको अधिकारीहरुले विश्वास गरेका छन् ।

एक व्यक्तिको शव कम्तीमा ९ माइल टाढा तल्लो म्यानहटनको स्प्रिंग स्ट्रीट स्टेशनमा फेब्रुअरी १२ सोमबार ट्र्याकमा खसेको वा हाम फालेको अवस्थामा फेला परेको थियो ।

अनुसन्धानकर्ताहरूले उक्त मृत्युमा कुनै अपराधको आशंका गरेका थिएनन् तर प्रारम्भिक अनुसन्धानमा ती व्यक्तिको देब्रे खुट्टा फेला पार्न नसकेको प्रहरीले जनाएको थियो ।

ट्रेनले ब्रोन्क्सको १६७ औं स्ट्रीट स्टपसम्म ट्र्याकमा खुट्टा तानेको हुनसक्ने अधिकारीहरुको भनाई छ । अधिकारीहरुले यो एकै व्यक्तिको खुट्टा हो भनेर निश्चित रूपमा भन्न सकेका छैनन् । डीएनए र रगत परीक्षणले यो एउटै व्यक्तिको हो भनेर देखाउने उनीहरुको अनुमान छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com