अयोध्याबाट फर्किएपछि प्रधानमन्त्री मोदीको घोषणा- ‘एक करोड घरमा सोलार प्यानल जडान गर्छौं’
प्रकाशित मिति : माघ ८, २०८० सोमबार
अयोध्याको राममन्दिरमा प्राण प्रतिष्ठा गरेपछि भारतीय प्रधानमन्त्री नरेन्द्र मोदीले एक करोड घरमा सोलार प्यानल जडान गर्ने घोषणा गरेका छन् ।
प्रधानमन्त्री सूर्योदय योजनाको नाम राखेर एक करोड घरमा सोलार प्यानल जडान गर्ने घोषणा गरेका हुन् । अयोध्यामा अभिषेकको शुभ अवसरमा आफ्नो संकल्पलाई अझ बलियो बनाएको बताउँदै भारतीय जनताका घरको छतमा आफ्नै सौर्य रूफ टप सिस्टम हुनुपर्ने बताए ।
सामाजिक सञ्जाल एक्समार्फत प्रधानमन्त्री मोदीले अयोध्याबाट फर्केपछि सरकारको पहिलो निर्णय प्रधानमन्त्री सूर्योदय योजना सुरु गर्ने रहेको उल्लेख गरे ।
उनले यस योजनाले गरिब र मध्यम वर्गको बिजुलीको बिल मात्र कम गर्ने नभई भारतलाई ऊर्जा क्षेत्रमा आत्मनिर्भर बनाउने विश्वास लिए ।
दिल्ली पुगेपछि उनले यस्तो घोषणा गरेका हुन् । प्रधानमन्त्री नरेन्द्र मोदीले सोमबार अयोध्याको राम मन्दिरमा रामलल्लाको मूर्तिलाई अभिषेक गरेका थिए । अनुष्ठानमा संघ प्रमुख मोहन भागवत, यूपी सीएम योगी आदित्यनाथ र राज्यका गभर्नर आनन्दीबेन पटेल उपस्थित थिए।
साथै यस कार्यक्रममा सहभागी हुन देशभरका चर्चित व्यक्तित्वहरु अयोध्या पुगेका थिए ।