सन् २०२४ मा विश्वका घुम्नैपर्ने न्युयोर्क टाइम्सको ५२ स्थानको सुचीको ३७ नम्बरमा मुस्ताङ
प्रकाशित मिति : पुस २५, २०८० बुधबार
न्युयोर्क टाइम्सले सन् २०२४ मा विश्वका घुम्नैपर्ने ५२ स्थानको सुची प्रकाशित गरको छ, जसमा ३७ नम्बरमा नेपालको मुस्ताङ रहेको छ । नेपालको उत्तरी भेगमा तिब्बती पठारको अग्लो स्थानमा रहेको प्राचीन हिमाली राज्य मुस्ताङ परम्परागत तिब्बती संस्कृतिको गढ रहेको र यसको दुर्गमताका कारण शताब्दीयौंदेखि संरक्षित रहेको उल्लेख गरिएको छ ।
यस क्षेत्रलाई चीनको सहयोगमा निर्मित चीनसँग जोड्ने १८३ माइलको नयाँ सडक र पोखराको उज्यालो तर ऋणको भार बोकेको विवादास्पद अन्तर्राष्ट्रिय विमानस्थलले यात्रुहरूलाई माथिल्लो मुस्ताङको लो मान्थाङको संरक्षित मध्ययुगीन किल्ला जस्ता स्थलहरूमा सहज पहुँच प्रदान गर्ने न्युयोर्क टाइम्सको रिपोर्टमा उल्लेख छ । जुन सन् १९९० को दशकसम्म पर्यटकका लागि प्रतिबन्धित क्षेत्र थियो।
अन्नपूर्ण र धौलागिरि हिमालहरू हुँदै उजाड पदयात्राले खोलाहरू, हिमतालहरू र चौँरी र भेडाहरूले भरिएका दुर्गम मार्गहरू पार गर्ने रिपोर्टमा उल्लेख छ । बजेट अनुकूल होटलहरू प्रशस्त रहेको उल्लेख गर्दै पदयात्रीहरूलाई स्थानीय इजाजतपत्र प्राप्त गाईड वा पोर्टर प्रयोग गर्न आवश्यक रहेको रिपोर्टमा स्मरण गराइएको छ ।
यसअघि गत वैशाखमा सिएनएनले पनि घुम्नैपर्ने विश्वका २३ ठाउँको सूचीमा मुस्ताङलाई समेटेको थियो। सिएनएनले मुस्ताङलाई चिनाउँदै माउन्टेन ट्रेकिङका लागि प्रसिद्ध परौणिककालीन पदमार्ग समेत रहेको उल्लेख गरेको थियो।