छिटो काम सकाउन न्युयोर्क एसाइलम अफिसले अधिकांशको एसाइलम आवेदन अस्वीकृत गर्ने गरेको खुलासा
प्रकाशित मिति : मंसिर ७, २०८० बिहीबार
न्युयोर्कमा रहेको युएससीआईएसको एसाइलम अफिसले समयको वचत गर्नका लागि स्वीकृत हुनुपर्ने आवेदनपनि अस्वीकृत गरेर अध्यागमन अदालतमा पठाउने गरेको एक अनुसन्धानले दावी गरेको छ । ब्रुकलिन कानून स्कूलमा सेफ हार्बर क्लिनिकले सार्वजनिक गरेको एक रिपोर्ट अनुशार न्युयोर्क एसाएइलम अफिसले वैध एसाइलमका दावीहरू पनि केवल समय बचत गर्न अस्वीकार गरिएको उल्लेख गरिएको छ ।
न्युयोर्क एसाइलम अफिसका एसाइलम अधिकारीहरू एक निष्क्रिय चक्रमा फसेको आफूहरुले फेला पारेको रिपोर्टमा उल्लेख छ । न्युयोर्कका एसाइलम अधिकारीहरुले अत्यन्तै कम दरमा मात्र एसाइलम स्वीकृत गर्दै आउनुको कारण एसाइलम स्वीकृत गर्नभन्दा अस्वीकृत गरेर अध्यागमन अदालतमा रिफर गर्दा कम सयम लाग्ने भएको जनाइएको छ । एसाइलम आवेदकको दावी स्वीकृत हुन योग्य भएतापनि समयको वचतका लागि यसो गर्ने गरेको पत्ता लागेको रिपोर्टमा जनाइएको छ ।
न्युयोर्कका पूर्व एसाइलम अधिकारीहरूले उनीहरूलाई दण्डित जस्तो र अवास्तविक गतिमा काम गर्नुपर्ने बाध्यता रहेका कारण त्यसलाई कायम नगरेमा जागिर गुमाउने खतरा समेत रहेको बताएको रिपोर्टमा उल्लेख छ । यदि उनीहरुले तीब्र गतिमा काम गर्न नसकेमा जागिर नै जोखिममा पर्ने भएकाले तथा स्वीकृत गर्दा धेरै समय लाग्ने भएकाले यस्तो भयंकर अवस्था श्रृजना भएको रिपोर्टमा उल्लेख छ ।
न्युयोर्कको एसाइलम कार्यालयले एसाइलम अधिकारीहरूलाई सकेसम्म चाँडो काम गर्न दबाब दिने गरेको र सोही आधारमा शरण अधिकारीको मूल्याङ्कन गर्ने भएकाले अधिकारीहरुले कामको गतिमा ध्यान दिनुपर्ने बाध्यता उत्पन्न भएको तथा यो गतिका कारण न्युयोर्कको एसाइलम कार्यलयमा डरको संस्कृति सिर्जना भएको रिपोर्टमा जनाइएको छ । रिपोर्ट अनुशार न्युयोर्क एसाइलम कार्यालयमा काम गर्ने पूर्व अधिकारीहरुले आफ्नो जागिर गुमाउने निरन्तर धम्कीमा काम गरेको बताएका छन् ।
त्यस्तै अन्तर्वार्ताको क्रममा न्युयोर्कका एसाइलम अधिकारीहरू शरणका लागि दिइएका आवेदन केबल अध्यागमन अदालतमा मुद्दा रिफर गर्न बहाना मात्र खोज्ने कानुन व्यवसायीहरुको आरोप छ । धेरै पूर्व एसाइलम अधिकारी र अध्यागमन वकिलहरुका अनुशार शरण अधिकारीहरूले तीन प्रकारका विसंगति स्थापित गर्न सकेको खण्डमा मात्र मुद्दाहरु अध्यागमन अदालतमा रिफर गर्न पाउँछन् । त्यसैले एसाएलम अधिकारीहरुले तीन बुँदा स्थापित गरेर मुद्दा अदालतमा पठाउनमा ध्यान केन्द्रित गर्दै आएको रिपोर्टमा उल्लेख छ ।
रिपोर्ट अनुशार केही पूर्व न्युयोर्कका एसाइलम अधिकारीहरुले आफूहरु काममा दयनीय अवस्थामा रहेको र समयको दबाबको कारण वैध दावीहरू समेत अस्वीकार गर्नुपर्दा गल्ती गरेको बोधका साथ काम गर्नुपरेको बताएका छन् । यदि एसाइलम स्वीकृत गर्नका लागि बहस गरेमा र समयसिमाबारेको कडा नियम पालना गर्न अस्वीकार गरेमा त्यस्ता एसाएइलम अधिकारीहरुलाई एक वर्षको परीक्षण अवधिमा नै व्यवस्थापनले कामबाट निकाल्ने वा काममा नै राखेपनि निरुत्साहित बनाएर राख्ने गरेको समेत रिपोर्टमा उल्लेख छ । जसका कारण धेरैले जागिर छाड्ने वा अरु एसाइलम कार्यालयमा सरुवा लिने गरेको जनाइएको छ ।