अमेरिकामा आर्टिफिसियल इन्टेलिजेन्सका क्षेत्रमा काम गर्न आउनेलाई सहज ग्रिनकार्डका लागि प्रकृया सुरु
प्रकाशित मिति : कार्तिक २३, २०८० बिहीबार
अमेरिकामा आर्टिफिसियल इन्टेलिजेन्सका क्षेत्रमा काम गर्न आउनेलाई सहज ग्रिनकार्डका लागि प्रकृया सुरु गरिएको छ । यसबारे राष्ट्रपति जो बाइडेनले नयाँ कार्यकारी आदेश जारी गर्दै विदेशी आर्टिफिसियल इन्टेलिजेन्स प्रतिभालाई आकर्षित गर्न र कायम राख्न पहलहरू सुरु गर्नका लागि संघीय एजेन्सीहरूलाई निर्देशन दिए लगत्तै डिपार्टमेन्ट अफ लेबरले यसको प्रकृया सुरु गरेको छ ।
आर्टिफिसियल इन्टेलिजेन्स एआईबारे अक्टोबर ३० को कार्यकारी आदेशमा अध्यागमन सम्बन्धित धेरै प्रावधानहरू समावेश थिए, जसमध्ये एउटा आर्टिफिसियल इन्टेलिजेन्स तथा सम्बन्धित तथा विज्ञान, प्रविधि, इन्जिनियरिङ र गणित सम्बन्धित अन्य पेशाहरू पहिचान गर्ने उद्देश्यले सार्वजनिक प्रतिकृया माग गर्न ४५ दिन भित्र जानकारीको लागि अनुरोध प्रकाशित गर्न निर्देशन दिइएको थियो ।
डिपार्टमेन्ट अफ लेबरले विज्ञान, प्रविधि, इन्जिनियरिङ र गणित सम्बन्धित तथा अन्य पेशाहरूको लागि सुव्यवस्थित ग्रीन कार्ड योग्यतामा सार्वजनिक प्रतिक्रियाको आव्हान गर्ने भएको छ । सुव्यवस्थित रुपमा ग्रिनकार्ड प्रकृयाका लागि योग्य पेशाहरूको अनुसूची ए सूचीको सम्भावित विस्तारका लागि डिपार्टमेन्ट अफ लेबरले आफ्नो प्रस्ताव व्यवस्थापन र बजेटको कार्यालयमा समीक्षाको लागि पेश गरेको छ।
प्रस्तावले विज्ञान, प्रविधि, इन्जिनियरिङ र गणित सम्बन्धित तथा अमेरिकी कामदारहरू कम आपूर्तिमा रहेका अन्य पेशाहरू समावेश गर्न अनुसूची ए को सम्भावित विस्तारका लागि निकट भविश्यमा नै सार्वजनिक टिप्पणीको आव्हान गर्ने अपेक्षा गरिएको छ ।
विद्यमान नियमहरू अन्तर्गत कम आपूर्तिमा रहेको अनुसूची ए मा पहिचान गरिएका पेशाहरूमा ग्रिनकार्ड आवेदन दिंदा श्रम बजार परीक्षणबाट गुज्रनु पर्दैन । साथै स्थायी श्रम प्रमाणीकरण आवेदन प्रक्रिया पनि आवश्यक नपर्न सक्छ । जसले रोजगारीमा आधारित ग्रिनकार्ढ प्राप्त गर्नको लागि समग्र टाइमलाइनलाई उल्लेखनीय रूपमा घटाउँछ ।
अनुसूची ए ले हाल केही स्वास्थ्य सेवा पेशाहरू र असाधारण क्षमता भएका व्यक्तिहरूलाई मात्र समेट्छ । यो सूचीलाई आर्टिफिसियल इन्टेलिजेन्ससहित विज्ञान, प्रविधि, इन्जिनियरिङ र गणित सम्बन्धित तथा अन्य कामदारको अभाव भएमा व्यवसायहरूमा विस्तार गर्ने सम्भावनाले रोजगारदाताको स्पोन्सरमा हुने ग्रिन कार्ड प्रक्रियालाई सुव्यवस्थित गर्ने दिशामा महत्त्वपूर्ण कदमको प्रतिनिधित्व गर्ने अपेक्षा गरिएको छ ।
एक पटक व्यवस्थापन र बजेटको कार्यालयबाट क्लियरेन्स प्राप्त भएपछि डिपार्टमेन्ट अफ लेबरले फेडरल रजिष्टरमा सुचना प्रकाशित गरेर सार्वजनिक टिप्पणीको लागि अनुरोध गर्नेछ । र सार्वजनिक टिप्पणीहरू पेश गर्ने समयसीमा तय गर्नेछ। बाइडेनको कार्यकारी आदेशले डिपार्टमेन्ट अफ लेबरलाई डिसेम्बर १४ सम्म सार्वजनिक प्रतिकृयाको लागि अनुरोध प्रकाशित गर्न आह्वान गरेको छ ।
जनताको प्रतिकृयालाई विचार गरेपछि डिपार्टमेन्ट अफ लेबरले अनुसूची ए लाई परिमार्जन गर्न प्रस्तावित वा अन्तरिम अन्तिम नियम जारी गर्न सक्छ, जसले अनुसूची ए मा कुनै पनि प्रस्तावित परिवर्तनहरूमा सार्वजनिक टिप्पणीको लागि थप अवसर प्रदान गर्नेछ।