अमेरिकामा बच्चा हेर्न आउनेहरुका लागि नियम संसोधन गर्दै अमेरिकी विदेश मन्त्रालय
प्रकाशित मिति : कार्तिक १३, २०८० सोमबार
अमेरिकी विदेश मन्त्रालयले अमेरिकामा एक्सचेन्ज भिजिटर अन्तरगत बच्चा हेर्न कार्यक्रमलाई स्पष्ट बनाउन र आधुनिकीकरण गर्न यो कार्यक्रमका नियमहरू संशोधन गर्ने प्रस्ताव गरेको छ । बाल हेरचाह र शैक्षिक अवयवहरूको पुनर्संरचना गर्ने, एजुकेयर कार्यक्रमलाई पार्ट टाइम विकल्पले प्रतिस्थापन गर्ने, बाल हेरचाह र होस्ट परिवार अभिमुखीकरण आवश्यकताहरू बढाउने लगायतका प्रस्ताव अमेरिकी विदेश मन्त्रालयले गरेको हो ।
त्यस्तै नयाँ होस्ट परिवारहरूसँग बाल हेरचाह गर्नेहरुको पुन मिलान गर्नको लागि मानक अपरेटिङ प्रक्रियाहरूलाई औपचारिक बनाउने र बाल हेरचाह सुरक्षाहरूलाई सुदृढ गर्न नयाँ आवश्यकताहरू प्रस्ताव समेत गरिएको छ । आज फेडरल रजिष्टरमा सुचना प्रकाशित गर्दै प्रस्तावित अमेरिकी विदेश मन्त्रालयले विशेष गरी बाल हेरचाह कार्यक्रमको पुनर्संरचना र साप्ताहिक क्षतिपूर्तिको गणनामा कमेन्ट आव्हान गरेको छ ।
अमेरिकामा सन् १९६१ को म्युचुअल एजुकेशनल एण्ड कल्चरल एक्सचेन्ज ऐनले सांस्कृतिक र शैक्षिक कार्यक्रमहरूको व्यवस्थापन गर्ने अधिकार अमेरिकी विदेश मन्त्रालयलाई दिएको छ। संसदले अमेरिकाका जनता र अन्य देशका जनता बीचको आपसी समझदारी बढाउन, अन्य राष्ट्रहरूसँग अमेरिकनलाई एकताबद्ध गर्ने सम्बन्धलाई बलियो बनाउन, शैक्षिक र सांस्कृतिक विकासको लागि अन्तर्राष्ट्रिय सहयोगलाई बढावा दिन तथा अमेरिका र विश्वका अन्य देशहरू बीच मैत्री, सहानुभूति र शान्तिपूर्ण सम्बन्धको विकासमा सहयोग गर्न को लागि फुलब्राइट हेज ऐन लागू गरेको थियो ।
बाल हेरचाह कार्यक्रम अन्तरगत विदेशी नागरिकहरू अमेरिकी होस्ट परिवारसँग बस्न जे वान भिसामा अमेरिका आउन सक्छन् । उनीहरुले होस्ट परिवारका बच्चाहरूको हेरचाह गर्दै र शैक्षिक कार्यक्रमहरूमा नामांकन गर्दै विभिन्न सांस्कृतिक गतिविधिहरूमा संलग्न हुन पाउँछन् । त्यसैले बाल हेरचाह कार्यक्रम अन्तरगत अमेरिकी होस्ट परिवारसँग बस्न र होस्ट परिवारको गृह जीवनमा प्रत्यक्ष रूपमा भाग लिने अवसर प्रदान गरिन्छ।
यो कार्यक्रमले अमेरिकी मूल्यमान्यता, संस्कृति र नेतृत्वको बारेमा बढी सचेत रहने विदेशी व्यक्तित्वको निर्माण गर्छ भने अमेरिकी परिवारहरूलाई पनि पारस्परिक सांस्कृतिक र शैक्षिक लाभहरू प्रदान गर्दछ । किनभने विदेशीले अमेरिकी बच्चाहरुको हेरचाह गर्दा विदेशी मूल्यमान्यता र संस्कृति पनि सिक्ने अवशर पाउँछन् ।