शुक्रबारदेखि अमेरिकामा म्याद सकिएका वर्क परमिटको म्याद ६ महिनामात्र थपिने पूरानै नियम कायम
प्रकाशित मिति : कार्तिक ११, २०८० शनिबार
अमेरिकामा शुक्रबारदेखि म्याद सकिएका वर्क परमिटको म्याद ६ महिनामात्र थपिने पूरानै नियम कार्यान्वयन सुरु भएको युएससीआईएसले जनाएको छ । वर्क परमिटको नविरकणका लागि आवेदन दिएका निश्चित आवेदकहरुको नवीकरण आवेदन विचाराधीन हुँदा तिनीहरूको म्याद सकिएको वर्क परमिट अब ६ महिनामात्र स्वत थपिने भएको छ । जसमा टीपीएसवाहक र एसाइलम आवेदकहरु समेत समावेश छन् ।
सामान्यतया युएससीआईएसले वर्क परमिटमा उल्लेखित म्याद समाप्त भएपछि पनि नविकरणका लागि आवेदन दिएकाहरुका हकमा १८० दिनसम्म स्वत म्याद थप्ने गर्दै आएको छ । तर मे २०२२ मा युएससीआईएसले एउटा अस्थायी नियम घोषणा गर्दै नविकरणका लागि आवेदन दिएका म्याद सकिएको वर्क परमिटको अवधि १८० दिनबाट बढाएर ५४० दिनसम्म स्वत लम्बाउन सुरु गरेको थियो ।
तर अब अक्टोबर २७ मा वा त्यसपछि वर्क परमिट नवीकरणका आवेदनहरू फाइल गर्नेहरुको म्याद सकिएको वर्क परमिट केबल १८० दिनसम्ममात्र लम्बिनेछ । अर्थात् अब सन् २०२२ को मे अगाडि नै नियम लागु भएको छ । यद्यपी पहिले नै अवधि लम्बिएका वर्क परमिटको अवधि भने खारेज हुनेछैन । अर्थात् उनीहरुको वर्क परमिटमा ५४० दिनकै विस्तारित अवधि कायम रहनेछ ।
२०२२ को नियम अन्तर्गत स्वचालित म्याद थपिएका वर्क परमिटका सन्दर्भमा उनीहरुले नविकरण आवेदनको निर्णय प्राप्त गरेपछि स्वचालित विस्तार अवधि भने समाप्त हुनेछ । यदि नविकरण आवेदनको निर्णय प्राप्त गर्न ढिलो भएमा ५४० दिनको थपिएको अवधिसम्म उनीहरुले वर्क परमिट प्रयोग गर्न सक्नेछन् ।
२०२२ मा ल्याइएको नियम समाप्त भएपनि युएससीआईएसले त्यस्तै प्रकारको अर्को नियमको आवश्यकता भए नभएको निर्धारण गर्ने प्रकृयामा रहेको जनाएको छ । किनभने वर्क परमिट नविकरणको निर्णय प्राप्त गर्न ढिलो हुँदा कैयन आवेदकहरु वर्क परमिटविहिन हुने खतरा समेत रहन्छ । अब यदि कसैले वर्क परमिटको नविरणको निर्णय आफ्नो पूरानो वर्क परमिटको म्याद सकिएको ६ महिनाभित्र प्राप्त गर्न सकेन भने त्यस्तो व्यक्ति वर्क परमिट विहिन हुने खतरा रहेको छ ।
युएससीआईएसले वर्क परमिटमा ब्याकलग कम गर्न नयाँ नीति ल्याउँदै सेप्टेम्बर २७ मा वा त्यसपछि स्वीकृत वर्क परमिटका निश्चित प्रकारका प्रारम्भिक र नवीकरण आवेदनहरूका सन्दर्भमा ५ बर्षको म्यादसहितको वर्क परमिट जारी गर्न सुरु गरेको छ । वर्क परमिटको अधिकतम वैधता अवधिलाई पाँच वर्षमा बढाउँदा आवेदनको संख्या घट्ने भएकाले ब्याकलग पनि कम हुने अपेक्षा गरिएको छ ।