Follow @khasokhasmag

दश दिनदेखि बाटो अवरुद्ध हुँदा समस्या


प्रकाशित मिति : भाद्र ५, २०७४ सोमबार

गौशाला, ५ भदौ । महोत्तरी जिल्लाको मुख्य जलेश्वर–जनकपुर सडकखण्ड १० दिनदेखि अवरुद्ध हुँदा जिल्लावासीलाई समस्या भएको छ ।

जिल्लाकै प्रमुख सडकखण्ड अविरल वर्षाका कारण आएको भीषण बाढीबाट गत शनिबार क्षतिग्रस्त भएपछि अवरुद्ध हुँदा जिल्लावासीलाई समस्या भएको छ ।

जलेश्वर–जनकपुर सडकखण्डको आधा दर्जन बढी ठाउँमा बाढीले बाटो बगाएको तथा सो सडकखण्डको पर्सा र पिपरा बीचमा यातायात नै सञ्चालन हुन नसक्ने गरी बाटो कटान गरेका कारण आज १० दिनदेखि जलेश्वर–जनकपुर यातायात अवरुद्ध रहेको छ ।

जिल्लाकै मुख्य सडकका रुपमा रहेको यस सडकखण्ड अवरुद्ध हुँदा जिल्लाका दैनिक यातायात प्रभावित हुनाका साथै जिल्लावासीले आकस्मिक सेवाबाट वञ्चित भएका छन् ।

दुई दिनदेखि सो सडकखण्डमा पर्सा वारि र पिपरा पारि गरी दुई खण्डमा गरी बससेवा सञ्चालनमा आए पनि भरपर्दो र नियमित रहेको छैन । साथै, करिब दुई किमी पैदल हिँडेर दुईवटा बसमा बस्नुपर्ने बाध्यता रहेका कारण सरसामान बोकेर यात्रा गर्न नसकिने भएको छ ।

नभई नहुने कामकाजका लागि मात्रै सो सडकखण्डमा यात्रु जाने गरेका छन् भने बिरामी र अन्य आवश्यक कामकाजका लागि जिल्लावासी भारतीय शहर बजारमा जान बाध्य भएका छन् ।

तर जिल्लाको दोस्रो प्रमुख सडक जलेश्वर बर्दिवास सडकखण्ड सञ्चालनमा रहेको छ । रासस

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com