रिपब्लिकनहरूको निशानामा प्रदर्शनकारी विद्यार्थीहरूको भिसा
प्रकाशित मिति : कार्तिक ६, २०८० सोमबार
स्कट ओल्सन/गेटी /एएफपी
केही रिपब्लिकन राष्ट्रपति पदका उम्मेद्वारहरूले प्यालेस्टिनीहरूलाई समर्थन व्यक्त गर्ने वा इजरायलको सैन्य प्रतिक्रियाको आलोचना गर्ने विदेशी नागरिकहरूको विद्यार्थी भिसा रद्द गर्न र देशनिकाला गर्न आह्वान गरेका छन्। इजरायलमा हमासको आक्रमण पछि अमेरिकाभरका कलेज क्याम्पसहरूमा तनाव फैलिएको छ भने पूर्व राष्ट्रपति डोनाल्ड ट्रम्प र अन्य रिपब्लिकन राष्ट्रपति पदका उम्मेद्वारहरूले प्यालेस्टिनीहरूलाई समर्थन व्यक्त गर्ने वा इजरायलको सैन्य प्रतिक्रियाको आलोचना गर्ने विदेशी विद्यार्थीको भिसा रद्द गर्न र देश निकाला गर्न आह्वान गरेका हुन्।
यदपी केही कानुनी विज्ञहरूले भने यसले वाक स्वतन्त्रता र संविधानको पहिलो संसोधनको उल्लंघन गर्ने बताएका छन् । विद्यार्थीका प्रर्दशनहरु युद्धविरामको आग्रह वा प्यालेस्टिनी नागरिकहरूको उपचार र हत्याको निन्दादेखि लिएर हमासको आक्रमणको लागि इजरायललाई दोष दिनसम्मका छन् । जुन राजनीतिक परिदृश्यभरि आलोचना गरिएको छ। केही रिपब्लिकन उम्मेद्वारहरूले भने प्रदर्शनमा सहभागीहरूले हमासलाई समर्थन गरेको कुरा सामान्यीकरण गर्दै टिप्पणी समेत गरेका छन् ।
रिपब्लिकनबाट राष्ट्रपति दौडमा प्रमुख नेता ट्रम्पले यदि आफूले जितेमा उनको प्रशासनले कट्टरपन्थी, अमेरिका विरोधी र यहुदी विरोधी विदेशीहरूको विद्यार्थी भिसा रद्द गर्ने चेतावनी दिइसकेका छन् । फ्लोरिडाका गभर्नर रोन डिसेन्टिसले पनि हमासलाई समर्थन गर्ने अन्तर्राष्ट्रिय विद्यार्थीहरूलाई देश निकाला गर्नको लागि समर्थन व्यक्त गरेका छन् । उनले त्यस्ता व्यक्तिलाई अमेरिकामा भिसामा बस्ने अधिकार नभएको र अमेरिकामा अध्ययन गर्ने अधिकार नभएको उनले बताएका छन् ।
एक रेडियो अन्तर्वार्तामा सिनेटर टिम स्कटले यदि कलेजमा हमास समर्थक विदेशी विद्यार्थीहरू भएमा उनीहरूलाई उनीहरूको देशमा फिर्ता पठाइनुपर्ने बताएका छन् । यी प्रस्तावहरूले धेरै मुस्लिम आप्रवासीहरू विरुद्ध र इजरायलको समर्थनमा बढ्दो कट्टरपन्थी अडानहरू खडा गर्ने रिपब्लिकनको दृढ संकल्पलाई प्रतिबिम्बित गर्दछ । उनीहरुले गाजाबाट कुनै पनि शरणार्थीलाई स्वीकार गर्न नहुने बताएका छन् । उक्त क्षेत्रमा इजरायलले बिजुली काटेको छ भने हमासको आक्रमणको प्रतिक्रियामा खाना र इन्धन आपूर्ति पनि बन्द गरेको छ ।
केही रिपब्लिकनहरूले आफूलाई अभिव्यक्ति स्वतन्त्रताको दृढ रक्षकको रूपमा समेत उभ्याएका छन् । रिपब्लिकन नेताका प्रस्तावहरुले इजरायलले हमासविरुद्ध गरेको आक्रमणको विरोध गर्नेहरु र हमासको समर्थन गर्नेहरुलाई खतरनाक रूपमा मिलाउन सक्ने केही अधिकारकर्मीहरुले चेतावनी दिएका छन् । संविधानको पहिलो संशोधनले अमेरिकामा बस्ने सबै मानिसहरूलाई वाक स्वतन्त्रताको अधिकार सुरक्षित गर्दछ । उनीहरु अमेरिकी नागरिक भएपनि वा अमेरिकामा रहेका विदेशी नागरिक रहेपनि वाक स्वतन्त्रताको अधिकार सुरक्षित हुने अमेरिकन सिभिल लिबर्टीज युनियनका राष्ट्रिय कानूनी निर्देशक र जर्जटाउन विश्वविद्यालयका कानून प्राध्यापक डेभिल कोलले बताएका छन् ।