अमेरिकाको गैर आप्रवासी भिसा थप्दा/स्टाटस परिवर्तन गर्दा बायोमेट्रिक्स छुट, ८५ डलर शुल्क पनि नलाग्ने
प्रकाशित मिति : आश्विन ८, २०८० सोमबार
अक्टोबर १ देखि लागु हुने गरी अमेरिकाको गैर आप्रवासी भिसा थप्दा र स्टाटस परिवर्तन गर्दा ८५ डलर बायोमेट्रिक शुल्क नलाग्ने भएको छ । युएससीआईएसले आज गरेको घोषणा अनुशार गैरआप्रवासी स्थिति विस्तार वा परिवर्तन गर्ने आवेदन आई ५३९ का लागि बायोमेट्रिक सेवा शुल्क छुट दिइने भएको छ ।
आवेदन प्रक्रियाको एक भाग को रूपमा रहेको ८५ डलर बायोमेट्रिक सेवा शुल्क छुट गरिने र यदि आवेदन अक्टोबर १ वा पछि पोस्टमार्क गरिएको छ भने शुल्क तिर्न आवश्यक नभएको युएससीआईएसले प्रष्ट पारेको छ । यद्यपि अक्टोबर १ अघिका आवेदनका सन्दर्भमा भने निश्चित आवेदकहरुले बायोमेट्रिक अपोइन्टमेन्टको लागि सुचना पाउनेछन् भने उनीहरु त्यो अपोइन्टमेन्टमा निर्धारित समय अनुसार उपस्थित हुनुपर्छ।
तर धेरै जसो केसहरूमा अक्टोबर १ पछि आवेदकहरूलाई बायोमेट्रिक सेवाहरूको अपोइन्टमेन्टमा उपस्थित हुने समय निर्धारण गरिने छैन। यद्यपि युएससीआईएसले बायोमेट्रिक्स आवश्यक छ भनी निर्धारण गरेमा आवेदकले आफ्नो बायोमेट्रिक सेवा अपोइन्टमेन्टको लागि उपस्थित हुने जानकारी सहितको सूचना प्राप्त गर्नेछन्।
यदि आवेदकले गल्तीले बायोमेट्रिक सेवा शुल्क बुझाएमा र उक्त शुल्क आई ५३९ को शुल्क भन्दा छुट्टै पेश गरेको खण्डमा युएससीआईएसले बायोमेट्रिक सेवा शुल्क फिर्ता गर्नेछ भने भिसा थप वा स्टाटस परिवर्तनको फारम स्वीकार गर्नेछ । तर आवेदकले गल्तीले बायोमेट्रिक सेवा शुल्क बुझाएमा र उक्त शुल्क आई ५३९ को शुल्कसँगै एकसाथ जोडेर पेश गरिएमा भने त्यो गलत फाइलिङ मानिनेछ । यो अवस्थामा सम्पूर्ण आवेदन युएससीआईएसले अस्वीकार गर्नेछ । यदि आवेदकले क्रेडिट कार्ड भुक्तानीमा बायोमेट्रिक शुल्क समेत जोडेर पठाएमा युएससीआईएसले आवेदन स्वीकार गरेर आवेदन शुल्क मात्र लिनेछ ।
बायोमेट्रिक सेवा शुल्क छुट अक्टोबर १ वा त्योपछि आवेदन दिने सबै आवेदकहरूलाई लागू हुनेछ, जसमा एच फोर, एल टु र ई मा स्टाटस परिवर्तन गर्न चाहनेहरु समेत पर्नेछन् । उनीहरुका लागि युएससीआईएसले सेप्टेम्बर ३० सम्म बायोमेट्रिक्स आवश्यकता निलम्बन गरेको थियो। अब उनीहरु सहित सबैलाई छुट हुनेछ । आर्थिक बर्ष २०२२ को प्रगति रिपोर्टमा उल्लेख गरिए अनुसार युएससीआईएसले सबै आई ५३९ आवेदकहरूको लागि बायोमेट्रिक सेवा शुल्क र आवश्यकता हटाउने लक्ष्य पूरा गर्न प्रतिबद्ध रहेको जनाएको छ ।