के के भयो विश्वका नेताहरु को शिखर बैठकमा ?
प्रकाशित मिति : भाद्र २२, २०७३ बुधबार
चीनको हाङझाउ सहरमा आयोजित विश्वका प्रमुख २० अर्थतन्त्रका सरकार प्रमुखहरूको शिखर बैठक सम्पन्न भएको छ । बैठक समापनपछि पत्रकार सम्मेलनमा चीनका राष्ट्रपति सी जिनपिङले सम्मेलनप्रति विश्वमा असाधारण चाख र उच्च अपेक्षा देखिएको बताए ।
गत आइतवार सुरु भएको बैठकमा आर्थिक वृद्धि तथा वित्तीय अनुशासन तथा नियमनका विषयमा छलफल भएको थियो । बैठकमा विश्व अर्थतन्त्रका अतिरिक्त जलवायु परिवर्तन, शरणार्थी समस्या, आतंकवाद नियन्त्रण तथा जनस्वास्थ्यका विषयमा छलफल भएको थियो । बैठकमा विश्व अर्थतन्त्रका समस्या र समाधानका उपाय पहिल्याइएको दाबी राष्ट्रपति सीले गरेका थिए ।
‘नवीनता, पुनर्जिवन्तता, अन्तर्सम्बन्धित र समावेशी विश्व अर्थतन्त्रको निर्माण’ भन्ने नाराका साथ सुरु भएको सम्मेलनमा दुई दिन आर्थिक वृद्धिको नयाँ पाटो, मजबुत अन्तर्रा्िष्ट्रय व्यापार र लगानी, समावेशी तथा अन्तर्सम्बन्धित विकास, चुस्त विश्व आर्थिक तथा फाइनान्सियल नियमन आदि एजेडामा छलफल भएको छ ।
यसअघि सम्मेलनमा चीनिया राष्ट्रपति सीले ‘चीन विकासको नयाँ शुरुवात, सारा विश्वको वृद्धिको नयाँ नक्सा’ शीर्षकको लिखित सम्वोधनमा विश्व समाजका लागि अझ बढी सार्वजनिक वस्तु उपलब्ध गराउँदै जान चीन इच्छुक रहेको बताएका थिए । रसियाली राष्ट्रपति भ्लादिमिर पुटिनले चिनियाँ समकक्षी सी जिनपिनलाई आइसक्रिमको एउटा भाँडो उपहार दिएका थिए ।
आफ्नो कार्यकालको सम्भवतः अन्तिम चीन भ्रमणका सिलसिलामा अमेरिकाका राष्ट्रपति बाराक ओबामा सहित रुस, अष्ट्रेलिया, भारत, युरोपियन युनियन सहित संयुक्त राष्ट्रसंघ लगायतका प्रतिनिधि सहभागी भएका थिए ।
ओबामासँगको भेटमा चिनियाँ राष्ट्रपति सिले द्विपक्षीय सम्बन्धको स्वस्थ विकासका लागि वासिङ्गटनले मैत्री विश्वासका आधारमा दृढताका साथ मतभेदको नियन्त्रण तथा व्यवस्थापन गर्न आग्रह गरेका छन्।
