आँखा पाक्ने रोगको समस्या बढ्ँदो : रोग लागेमा के गर्ने ? कसरी बच्ने ? (टिप्ससहित)
प्रकाशित मिति : श्रावण २१, २०८० आईतबार
केही दिनयता देशका विभिन्न ठाउँमा आँखा पाक्ने रोग फैलिरहेको छ । चिकित्सकीय भाषामा आँखा पाक्ने रोगलाई ‘एडिनो भाइरस कन्जन्टिभाइटिस’ पनि भनिन्छ ।
आँखा पाक्ने रोग फैलिएसँगै काठमाडौंस्थित तीलगंगा आँखा अस्पताल, नेपाल आँखा अस्पताल लगायत देशभरका अस्पतालहरूमा विरामीको चाप बढेको छ । रोग फैलिएपछि स्वास्थ्य तथा जनसंख्या मन्त्रालयले सुरक्षा सर्तकता अपाउन आग्रह गरेको छ ।
लक्षणहरु :
– आँखा रातो हुने र चिलाउने
– आँखाबाट आँसु बगिरहने वा कचेरा / चिप्रा लाग्ने
– आँखाको ढकनी रातो हुने, सुन्निने
– आँखा बिझाउने/दुख्ने
– घाममा वा उज्यालोमा हेर्न गाह्रो हुने
रोकथामका उपायहरु :
भाइरल कन्जंक्टिभाइटिस (आँखा पाक्ने रोग) सजिलै एक व्यक्तिबाट अर्को व्यक्तिमा सर्न सक्छ । त्यसैले रोकथामका निम्न उपायहरु अपनाएर आँखा पाक्ने रोगबाट बचौँ।
– संक्रमित व्यक्तिसँग नजिकको सम्पर्कमा नजाने र संक्रमित व्यक्ति भिडभाडमा नजाने
– संक्रमित व्यक्तिले प्रयोग गरेका सामान जस्तै टावेल, रुमाल, सिरानी, तन्ना प्रयोग नगर्ने
– जथाभावी आँखा नछुने। आँखा छुनु परेमा छुनु अघि वा छोइसके पछि साबुन पानीले मिचिमिचि राम्रोसँग हात धुने
– व्यक्तिगत सरसफाइमा ध्यान दिने ।
भाइरल कन्जंक्टिभाइटिस भइहाले आत्तिनु पर्दैन । यो रोग १ देखि २ हप्तामा आफैँ निको हुन्छ । स्वास्थ्यकर्मीको सल्लाह बिना जथाभावी औषधी प्रयोग नगरौँ ।
आँखा पाक्ने रोग अर्थात् भाइरल कन्जक्टिभाइटिस लागेमा के गर्ने ?
भाइरल कन्जंक्टिभाइटिस रोग घरमै स्याहार गरे १ देखि २ हप्तामा आफैँ निको हुन्छ ।
घरमा स्याहार गर्दा ध्यान दिनु पर्ने कुराहरु :
– बरफले आँखा सेक्दा आँखा बन्द गरेर वा सफा रुमालमा राखेर सेक्ने ।
– आँखा नमिच्ने र आँखामा पानी नछ्याप्ने ।
– आँखा छोइसकेपछि साबुन पानीले मिचिमिचि राम्रोसँग हात धुने
– बाहिर घाममा जाँदा कालो चस्मा प्रयोग गर्ने ।
– संक्रमित व्यक्तिले प्रयोग गरेका रुमाल, टावेल, सिरानी, तन्ना आदि हरेक दिन धुने वा सफा गर्ने ।
– प्रशस्त मात्रामा पानी र पोषिलो खाना खाने ।
– संक्रमित व्यक्तिले प्रयोग गरेको सामान अन्य व्यक्तिलाई प्रयोग गर्न नदिने ।
स्वास्थ्यकर्मीको सल्लाह बिना जथाभावी औषधी प्रयोग नगरौँ । दृष्टि कम हुने लगायतका आँखा सम्बन्धी समस्या बढेमा उपचारको लागि तुरुन्त स्वास्थ्यसंस्था जाऔँ ।