डा. चन्द्र भण्डारीको परिवारमा बज्रपात, भाई गुमाएको १८ महिना नपुग्दै आमालाई पनि गुमाए
प्रकाशित मिति : फाल्गुन ४, २०७९ बिहीबार
ग्यास सिलिन्डर विस्फोटबाट घाइते भएकी नेपाली कांग्रेसका नेता डा. चन्द्र भण्डारीकी आमा हरिकला भण्डारीको निधन भएको छ । हरिकलाको कीर्तिपुर अस्पतालमा उपचारको क्रममा आज बिहान निधन भएको हो ।
बिहीबार राति काठमाडौंको बुद्धनगरस्थित निवासमा सिलिन्डर पड्किँदा भण्डारी आमाछोरा गम्भीर घाइते भएका थिए । उनीहरुलाई राति नै कीर्तिपुर अस्पतालमा ल्याइएको थियो । डा. भण्डारीको उपचार भइरहेको छ ।
भण्डारीले १८ महिना अघि मात्रै आफ्नै भाईलाई गुमाएका थिए । भण्डारीका भाई डा. शंकर भण्डारीको गत २०७८ साल असार १६ ले सवारी दुर्घटनामा परि निधन भएको थियो ।
शंकरको गतवर्ष रूपन्देहीको देवदह नगरपालिका–१० चरंगेमा बा १७ च ६०६६ नम्बरको कार दुर्घटनामा निधन भएको थियो । उनी त्रिभुवन विश्वविद्यालयका सहप्राध्यापकसमेत थिए । भाइ गुमाएको डेढ वर्षपछि भण्डारीले आफ्नी ८६ वर्षीय आमा हरिकला भण्डारीलाई गुमाउनु परेको छ ।
ग्यास सिलिन्डर बिस्फोट हुँदा जलेर घाइते भण्डारीको यथोचित उपचार नेपालमा सहज नहुने भन्दै अस्पतालले देशबाहिर सुविधा सम्पन्न स्वास्थ्य संस्थामा लैजान सिफारिस गरेको छ ।
अस्पताले सिफारिस गरेबमोजिम भण्डारीलाई थप उपचारका लागि भारत लैजाने तयारी भइरहेको जनाइएको छ । अस्पतालका अनुसार डा. भण्डारीको अनुहार, दुबै हात र दुवै गोडाहरूमा गरी २५–३० प्रतिशल शरिर जलेको छ ।