युएससीआईएसबाट कोरोना सम्बन्धित लचकता मार्च २३ सम्मका लागि अन्तिम पटक विस्तार
प्रकाशित मिति : माघ १०, २०७९ मंगलबार
युएससीआईएसले कोरोना सम्बन्धित लचकताहरू विस्तार गर्दै विभिन्न ८ प्रकारका कागजातहरु तोकिएको मितिले ६० दिनसम्म ढिलो बुझाउन सकिने जनाएको छ । यस्तो लचकता आगामी मार्च २३ सम्मका लागि विस्तार गरिएको युएससीआईएसले जनाएको छ ।
यी लचकताहरू अन्तर्गत युएससीआईएसले ८ प्रकारका अनुरोध वा सूचनाहरूमा तोकिएको मिति पछि ६० क्यालेन्डर दिन भित्र प्राप्त जवाफलाई पनि स्वीकार गर्नेछ । आगामी मार्च २३ सम्म जारी हुने त्यस्ता सुचनाहरुका सन्दर्भमा मात्र यो नियम लागु हुनेछ ।
थप प्रमाणको लागि अनुरोध, प्रमाणहरू अनुरोध गर्ने निरन्तरता, अस्वीकार गर्ने उद्देश्यको सूचनाहरू, खारेज गर्ने उद्देश्यको सूचनाहरू,
उल्टाउने उद्देश्यको सूचनाहरू, क्षेत्रीय केन्द्रहरू समाप्त गर्ने उद्देश्यका सूचनाहरू, टीपीएस फिर्ता लिने उद्देश्यको सूचनाहरू र नागरिकताको आवेदन स्वीकार भइसकेपछि प्राप्त नराम्रा जानकारीको आधारमा आवेदन पुन खोल्ने सुचनाहरुमा यो लचकता लागु हुनेछ ।
त्यसका अतिरिक्त युएससीआईएसले अपीलका लागि पेश गरिने आई २९० बी वा नागरिकता प्रकृयामा सुनुवाईका लागि अनुरोध गर्ने फर्म एन ३३६ का सन्दर्भमा पनि यो लचकता दिनेछ । तर ती फर्महरु युएससीआईएसले निर्णय दिएको ९० दिनभित्र फाइल गरेको हुनुपर्ने र मार्च २३, २०२३ भन्दा अगाडिको निर्णयको सन्दर्भमा मात्र लागु हुने जनाइएको छ ।
लचकतामा यो विस्तार सम्भवत अन्तिम हुने युएससीआईएसले बताएको छ । मार्च २३ भन्दा पछाडिका मितिका अनुरोध वा सूचनामा उल्लिखित डेडलाइन र आवश्यकताहरूको पालना गर्नुपर्ने युएससीआईएसको भनाई छ । स्मरणीय छ, मार्च २०२० मा घोषणा गरिएको पुन उत्पादन हस्ताक्षर लचिलोपन जुलाई २५, २०२२ मा स्थायी नीति बनिसकेको छ ।