नील आर्मस्ट्रङसँगै चन्द्रमामा पुगेका बज एल्ड्रिनले ९३ औं जन्मदिनमा गरे चौथो विवाह
प्रकाशित मिति : माघ ७, २०७९ शनिबार
नील आर्मस्ट्रङसँगै चन्द्रमामा पुगेका बज एल्ड्रिनले ९३ बर्षको जन्मदिनमा विवाह गरेका छन् । बज एल्ड्रिन सन् १९६९ को अपोलो ११ मिसनमा चन्द्रमामा पाइला राख्ने दुई अन्तरिक्ष यात्रीमध्ये एक हुन् ।
उनले आफ्नो ९३ औं जन्मदिनमा विवाह गरेको शुक्रबार ट्वीटमार्फत घोषणा गरेका छन् । उनले एन्का फौरसँग लस एन्जलस, क्यालिफोर्नियामा एउटा सानो समारोहमा विवाह गरेका छन् ।
६४ बर्षकी आन्का फौर एक मेडिकल डाक्टर हुन् जसले हाल बज एल्ड्रिनको कम्पनी बज एल्ड्रिन भेन्चर्सका कार्यकारी उपाध्यक्षको रूपमा काम गर्छिन् । आन्काले १९९६ मा पिट्सबर्ग विश्वविद्यालयबाट केमिकल इन्जिनियरिङमा पीएचडी गरेकी थिइन्।
आफ्नो ९३औं जन्मदिनमा र आफूलाई लिभिङ लेजेन्ड्स अफ एभिएसनद्वारा सम्मानित गरिएको दिनमा विवाह गरेको घोषणा गर्न पाउँदा खुसी भएको उनले बताएका छन् । आफू लामो समयदेखिको आन्का फौरसँग प्रेममा रहेकोमा जन्मदिनमा विवाह बन्धनमा बाँधिएको उनले बताएका छन् ।
On my 93rd birthday & the day I will also be honored by Living Legends of Aviation I am pleased to announce that my longtime love Dr. Anca Faur & I have tied the knot.We were joined in holy matrimony in a small private ceremony in Los Angeles & are as excited as eloping teenagers pic.twitter.com/VwMP4W30Tn
— Dr. Buzz Aldrin (@TheRealBuzz) January 21, 2023
पूर्व अन्तरिक्ष यात्री एल्ड्रिनले आफू र उनकी पत्नी भागेर विवाह गर्ने टिनएजरजस्तै उत्साहित भएको बताएका छन् । एल्ड्रिनको यो पहिलो विवाह भने होइन ।
उनले योसहित चार पटक विवाह गरिसकेका छन्। उनको पहिलो विवाह डिसेम्बर २०, १९५४ मा जोन आर्चरसँग गरेका थिए । उनीहरुका तीन छोराछोरी भए । पछि उनीहरुले सन् १९७४ मा डिभोर्स फाइल गरे ।
एल्ड्रिनको दोश्रो विवाह बेवर्ली भ्यान जिलेसँग सन् १९७५ डिसेम्बर ३१ मा भयो । तर उनीहरुले १९७८ मा डिभोर्स गरे । उनको तेश्रो विवाह लोइस ड्रिग्स क्याननसँग सन् १९८८ फरबरी १४ मा भएको थियो । उनीहरुले सन् २०१२ मा डिभोर्स गरे ।
एल्ड्रिनका तीनजना पनाती र तीनजना पनातिनी छन् । त्यस्तै एकजना छोरीतिरका नातीपनि छन् ।
एल्ड्रिन एपोलो ११ मिशनमा तीन अन्तरिक्ष यात्रीहरू मध्ये अहिलेसम्म जीवित रहेका एक मात्र व्यक्ति हुन् ।
नील आर्मस्ट्रङ सन् १९६९ को जुलाई २० को राति न्युयोर्क समय ९ बजेर ५६ मिनेटमा चन्द्रमाको सतहमा पाइला टेक्ने पहिलो अन्तरिक्ष यात्री थिए। त्यसको १९ मिनेटपछि बज एल्ड्रिनले पाइला टेकेका थिए ।