Follow @khasokhasmag

फेरि बढ्यो परिवारमा आधारित ग्रिनकार्ड पाउन लाग्ने अवधि, रोजगारमा आधारित ग्रिनकार्डको अवस्था के छ ?


प्रकाशित मिति : माघ २, २०७९ सोमबार

परिवार र रोजगारमा आधारित ग्रिनकार्डका सन्दर्भमा अमेरिकी विदेश मन्त्रालय ब्यूरो अफ कन्सुलर अफेयर्सले फेब्रुअरीको भिसा बुलेटिन जारी गरेपनि सबै मिति जनवरीकै कपीपेष्ट गरेको छ । अर्थात् जनवरीका तुलनामा फेब्रुअरीमा रोजगार र परिवारमा आधारित ग्रिनकार्ड फाइल गर्ने र पाउने मितिमा कुनै पनि टसमस भएको छैन, बरु रोजगारमा आधारित तेश्रो श्रेणीको अन्य कामदारका लागि ग्रिनकार्ड फाइल गर्ने मिति अझ पछाडि सरेको छ । परिवार र रोजगारमा आधारित प्राय सबै श्रेणीमा ग्रिनकार्ड फाइल गर्ने र पाउने अवधि जनवरीको तुलनामा १ महिना बढेको छ ।

ग्रिनकार्ड पाउने मिति २०२१ को सेप्टेम्बरदेखि नै जस्ताको तस्तै रहँदा परिवारमा आधारित  श्रेणीका ग्रिनकार्डका लागि लाग्ने अवधि बढेको बढ्यै छ । ग्रिनकार्ड पाउनका लागि २०२१ को सेम्टेम्बरमा जुन मिति कायम थियो अहिले पनि त्यही मिति कायम छ ।

जसको अर्थ परिवारमा आधारित विभिन्न श्रेणीको ग्रिनकार्ड पाउने लाग्ने समय र अमेरिकामा नै हुनेहरुले फाइल गर्नका लागि लाग्ने गतबर्षको सेप्टेम्बरको तुलनामा १६ महिना बढेको छ । अमेरिकी नागरिकका २१ बर्ष काटेका अविवाहित छोराछोरी, ग्रिनकार्डवाहकका २१ बर्ष काटेका अविवाहित छोराछोरी, अमेरिकी नागरिकका विवाहित छोराछोरीहरु र अमेरिकी नागरिकका दाजुभाई दिदीबहिनीहरुका सन्दर्भमा ग्रिनकार्ड पाउने र फाइल गर्ने मितिमा कुनै फेरवदल नभएको हो ।

ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा भने भिसा करेन्ट रहेको छ । जसको अर्थ अमेरिकाबाहिर रहेका ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा नेशनल भिसा सेन्टरले भिसा करेन्ट हुने मिति प्रतिक्षा नगरी सिधै प्रकृया अगाडि बढाउँछ । अमेरिकाभित्रै हुने ग्रिनकार्ड बाहकका दम्पत्ति र २१ बर्ष नकाटेका छोराछोरीका सन्दर्भमा आई १३० फर्मका साथमा ग्रिनकार्ड आवेदन आई ४८५ फाइल गरेर वर्क परमिट र ट्राभल डकुमेन्ट प्राप्त गर्नसकिन्छ । साथै अध्यागमन स्टाटस जोगाउने झन्झट पनि हुँदैन ।

फेब्रुअरीको भिसा बुलेटिन अनुशार अमेरिकी नागरिकका २१ बर्ष काटेका अविवाहित छोराछोरीले ग्रिनकार्ड पाउन लाग्ने अवधि ८ बर्ष २ महिना पुगेको छ । ग्रिनकार्डवाहकका २१ बर्ष काटेका अविवाहित छोराछोरीका लागि ग्रिनकार्ड पाउन लाग्ने अवधि पनि ७ बर्ष ५ महिना पुगेको छ । अमेरिकी नागरिकका विवाहित छोराछोरीहरुले ग्रिनकार्ड पाउन लाग्ने अवधि १४ बर्ष ३ महिना पुगेको छ भने अमेरिकी नागरिकका दाजुभाई दिदीबहिनीहरुका सन्दर्भमा ग्रिनकार्ड पाउन लाग्ने अवधि १५ बर्ष ११ महिना पुगेको छ ।

कम दक्षता हुने रोजगारमा आधारित तेश्रो श्रेणीका अन्य कामदारले ग्रिनकार्ड फाइल गर्न पाउने मितिपनि सेप्टेम्बर ८, २०२२ बाट २०२० को फेब्रुअरीमा पछाडि सरेको छ । झण्डै साढे ३ बर्षदेखि ग्रिनकार्ड फाइल गर्न प्रतिक्षा गरिरहेका उनीहरुले अक्टोबरमा ग्रिनकार्ड आवेदन आई ५८५ फाइल गर्न र त्यसका आधारमा वर्क परमिट, एड्भान्स परोल लगायतका डकुमेन्टहरु प्राप्त गर्नसक्ने गरी भिसा बुलेटिनमा व्यवस्था गरिएकोमा यो व्यवस्था नोभेम्बर, डिसेम्बर हुँदै जनवरीमा पनि कायम गरिएको थियो । तर फेब्रुअरीको भिसा बुलेटिनमा अब यो मिति २ बर्ष पछाडि पुगेको छ ।

 

रोजगारमा आधारित ग्रिनकार्डको अवस्था के छ ?

रोजगारमा आधारित तेश्रो श्रेणीको अन्य कामदारमा अमेरिकामा नेपालीहरुको संख्या पनि उल्लेख्य रहेको छ । उनीहरुका लागि भिसा करेन्ट नहुँदा भिसा करेन्ट हुँदासम्मका लागि स्टाटस जोगाउन निकै समस्या हुनेगरेको छ ।

२ बर्षभन्दा कम अवधि खास दक्षता नचाहिने काम गरेको अनुभव, उक्त कामका लागि अमेरिकामा कामदार नभएको अवस्था र लेबर सर्टिफिकेशनका अन्य प्रावधानहरु पूरा गरेका व्यक्ति रोजगारमा आधारित तेश्रो श्रेणीको अन्य कामदारमा योग्य हुनसक्छन् ।

रोजगारमा आधारित दोश्रो श्रेणीका लागि नोभेम्बरमा भिसा करेन्ट रहेकोमा डिसेम्बर, जनवरी हुँदै फेब्रुअरीमा १ डिसेम्बर २०२२ भन्दा अगाडि प्राथमिकता मिति भएकाहरुलेमात्र ग्रिनकार्ड आवेदन आई ४८५ फाइल गर्न सक्नेछन् । अर्थात् फेब्रुअरीमा रोजगारमा आधारित दोश्रो श्रेणीका लागि आई १४० का साथमा आई ४८५ फाइल गर्न नपाइने भएको छ ।

रोजगारमा आधारित चौथो श्रेणीको ग्रिनकार्डका लागि पनि फेब्रुअरीमा भिसा करेन्ट रहेको छैन । सन् २०२२ को जुलाई २२ अगाडि प्राथमिकता मिति भएकाहरुलेमात्र यो श्रेणीमा ग्रिनकार्ड आवेदन दिन सक्नेछन् । त्यस्तै निश्चित धार्मिक कामदारका सन्दर्भमा पनि फेब्रुअरीमा सन् २०२२ को जुलाई २२ अगाडि प्राथमिकता मिति भएकाहरुलेमात्र ग्रिनकार्ड आवेदन दिन सक्नेछन् । रोजगारमा आधारित पहिलो र तेश्रो श्रेणी स्कील्ड वर्कर भने करेन्ट रहेको छ ।

 

© 2022 KHASOKHAS®. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com