देउवासँग ‘वान टु वान’ वार्ता गर्न बालुवाटार पुगे प्रचण्ड
प्रकाशित मिति : पुस १०, २०७९ आईतबार
सत्ता गठबन्धनको बैठक बस्नुअघि प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीच ‘वान टु वान’ वार्ता हुने भएको छ। अहिले केहीबेरमा गठबन्धनको बैठक बस्दैछ । भने त्यसअघि नै प्रधानमन्त्री देउवासँग ‘वान टु वान’ वार्ता गर्न प्रचण्ड बालुवाटार पुगेका छन् ।
स्रोतका अनुसार पहिला प्रचण्ड र देउवाबीच वान टु वान वार्ता हुनेछ, त्यसपछि मात्र एकीकृत समाजवादीका अध्यक्ष माधव कुमार नेपालसहित तीन नेताहरु बसेर टुंगोमा पुग्ने तयारी छ ।
देउवा, प्रचण्ड र नेपालबीचको छलफलपछि सत्ता गठबन्धनको बैठक बस्ने छ। राष्ट्रपति विद्यादेवी भण्डारीले प्रतिनिधिसभामा प्रतिनिधित्व गर्ने राजनीतिक दलहरूलाई नयाँ सरकार गठन गर्न दिएको समय (पुस १० गते) आज साँझ ५ बजे सकिँदै छ। ‘प्रधानमन्त्री नियुक्त गर्नको लागि नेपालको संविधानको धारा ७६ को उपधारा (१) बमोजिम कुनै पनि दलले स्पष्ट बहुमत प्राप्त गरेको नदेखिएकोले नेपालको संविधानको धारा ७६ को उपधारा (२) बमोजिम प्रतिनिधि सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधि सभाको सदस्यलाई नेपालको प्रधानमन्त्री नियुक्त गर्नका लागि मिति २०७९-९-१० गते आइतबार १७ः०० बजेभित्र दाबी पेस गर्न सम्माननीय राष्ट्रपतिज्यूबाट आह्वान भएको बेहोरो अनुरोध छ,’राष्ट्रपति कार्यालयको सूचनामा भनिएको छ ।
उक्त समयसीमाअघि नै सहमति गर्न नेताहरु दौडधुप गरिरहेका छन्। देउवासँग प्रचण्डको संवादअघि कांग्रेसका शीर्ष नेताहरु बालुवाटारमा भेला भएर छलफल गरेका थिए।
उता, माओवादी केन्द्रको बैठक पनि जारी छ । भने उक्त बैठकमा कांग्रेस नेता बिमलेन्द्र निधि समेत पुगेका छन् ।
हालै सम्पन्न निर्वाचनअन्तर्गत प्रतिनिधिसभाका दुई सय ७५ सिटमध्ये कांग्रेस ८९, नेकपा एमाले ७८, नेकपा (माओवादी केन्द्र) ३२, राष्ट्रिय स्वतन्त्र पार्टी २०, राष्ट्रिय प्रजातन्त्र पार्टी १४, जनता समाजवादी पार्टी नेपाल १२, नेकपा (एकीकृत समाजवादी) १०, जनमत पार्टी छ, लोकतान्त्रिक समाजवादी पार्टी चार, नागरिक उन्मुक्ति पार्टी तीन, राष्ट्रिय जनमोर्चा र नेपाल मजदुर किसान पार्टी एक–एक स्थानमा तथा पाँच स्वतन्त्र उम्मेदवार निर्वाचित भएका छन् ।