माओवादीले पनि गर्यो आफ्नै नेतृत्वमा सरकार बनाउने निर्णय
प्रकाशित मिति : पुस ७, २०७९ बिहीबार
नेकपा माओवादी केन्द्रले वर्तमान गठबन्धन कायम राख्दै आफ्नै पार्टीको नेतृत्वमा सरकार बनाउने निर्णय गरेको छ। बिहीबार पार्टी केन्द्रीय कार्यालय पेरिसडाँडामा बसेको पदाधिकारी बैठकले उक्त निष्कर्ष निकालेको हो। अध्यक्ष पुष्पकमल दाहाल प्रचण्ड दलको नेता चयन भएसँगै सरकार निर्माणबारे अन्य दलहरूसँग संवाद र छलफल अघि बढाउने निर्णय पनि माओवादीले गरेको छ।
पदाधिकारी बैठकपछि सिंहदरबारमा बसेको संसदीय दलको बैठकले प्रचण्डलाई संसदीय दलको नेता, हितराज पाण्डेलाई प्रमुख सचेतक र राष्ट्रियसभा दलको नेतामा नारायणकाजी श्रेष्ठलाई सर्वसम्मत चयन गरेको छ।
संसद्को सबैभन्दा ठूलो दल नेपाली कांग्रेस । कांग्रेस कार्यसम्पादन समितिको बैठकले संघदेखि प्रदेशसम्म आफ्नै नेतृत्वमा सरकार बनाउने यसअघि नै गरिसकेको छ ।
राष्ट्रपति विद्यादेवी भण्डारीले संविधानको धारा ७६ (२) अनुसार पुस १० गते साँझ ५ बजेसम्ममा बहुमतसहित सरकारको दाबी गर्न दलहरुलाई समय दिएकी छन्।
