२ गोल गर्दै फ्रान्स फाइनलमा, आइतबार अर्जेन्टिनासँग भिड्ने
प्रकाशित मिति : मंसिर २८, २०७९ बुधबार
मोरक्कोविरुद्ध २ गोल गर्दै फ्रान्स फाइनलमा प्रवेश गरेको छ । अब अर्जेन्टिनाका लियोनल मेस्सी र फ्रान्सका केलियन एमबाप्पे विश्वकप २०२२ को फाइनलमा आइतवार आमनेसामने हुने भएका छन् ।
यी दुई स्टार यस वर्षको गोल्डेन बुटका लागि पनि प्रतिस्पर्धामा छन् । गोल्डेन बुट प्रतियोगितामा सबैभन्दा बढी गोल गर्ने खेलाडीको अवार्ड हो । दुवैले अहिलेसम्म पाँच पाँच गोल गरेका छन् ।
शनिबार क्रोएसिया र मोरक्कोबीच तेश्रो स्थानका लागि खेल हुनेछ ।
खेलको पाँचौं मिनेटमा फ्रान्सले मोरक्कोविरुद्ध पहिलो गोल गरेको थियो भने ७९ औं मिनेटमा दोश्रो गोल गरेको थियो । सेमिफाइनलमा पुग्ने पहिलो अफ्रिकी राष्ट्र मोरक्कोले थप इतिहास बनाउन भने सकेन ।
मोरक्कोको फुटवल टिम एटलस लायन्स पहिले नै विश्वकप इतिहासमा सबैभन्दा सफल अफ्रिकी टोली हो । मोरक्कोले प्रतियोगिताको अन्तिम चारमा पुग्ने पहिलो अफ्रिकी राष्ट्र बनेर इतिहास रचेको छ ।
सेमिफाइनलमा पुग्न मोरक्कोले युरोपेली हेवीवेट्स बेल्जियम, स्पेन र पोर्चुगललाई हराएको थियो । मोरक्कोले पोर्चुगललाई हराएपछि, मुख्य प्रशिक्षक वालिद रेग्रागुईले आफ्नो टोलीलाई रकीसँग तुलना गरेका थिए ।
मोरक्को विश्वकपको क्वार्टरफाइनल र सेमिफाइनलमा पुग्ने पहिलो अरब राष्ट्र पनि हो । राष्ट्रहरू बीचको घनिष्ठ सम्बन्धको बाबजुद मोरक्को र फ्रान्सले यस अगाडि मात्र पाँच पटक खेलेका थिए । जसमा मोरक्कोले चार पटक हारेको थियो भने एक पटक बराबरी खेलेको थियो ।
आजको खेलका थप तस्वीरहरु:
