रवि लामिछानेले मतदानपछि मतपेटिका ढोग्दै भने -‘म एक नेपाली नागरिक, प्रयोग गरें मताधिकार’
प्रकाशित मिति : मंसिर ३, २०७९ शनिबार
चितवन २ बाट प्रतिनिधिसभा सदस्यमा उम्मेदबारी दिएका रवि लामिछानेले मतदानपछि मतपेटिका ढोग्दै भनेका छन् – ‘म एक नेपाली नागरिक , मैले प्रयोग गरें मेरो मताधिकार ।’
उनले मतदान गरेको तस्वीर सामाजिक सञ्जालमा हाल्दै त्यसो भनेका हुन् । मतदानमा जानु अगाडि उनले सामाजिक सञ्जालमा भनेका थिए -‘नेपाल केही खराब मुठ्ठीभर हरुको दल दल मा फसेको छ। म सँग वा हाम्रो पार्टी सँग तपाईका लाख असहमति होलान् , ती हामी सल्ट्याउला। तर देशलाई चरम भ्रष्टाचार र बेथितिको यो दलदल बाट बाहिर निकालौं। हामी आँट गरेर आएका छौ। यस पटक हाम्रो हात समाउनु होस्।’
‘यो चेतना, लहर, उत्साह र आशा देखिन अर्को युग पर्खनु पर्छ। के हामी फेरि अर्को एउटा सिङ्गो युग बर्वाद पार्न सक्छौं । घर बाट भोट हाल्न निस्कदै गर्दा सोच्नु होला। हामी बीचका असहमतिको उपचार छ तर यो बेथितिको अर्को उपचार उपाय छैन।’ – उनले सामाजिक सञ्जालमा भने ।
पत्रकारिता छाडेर राजनीतिमा हामफालेका रवि लामिछानेले चितवनबाट उम्मेदबारी दिएका हुन् ।