डिभीको कन्फर्मेशन नम्बर हरायो? यसरी प्राप्त गर्नुहोस् सहजै
प्रकाशित मिति : बैशाख २२, २०८१ शनिबार
२०२५ को डिभी लोटरीको नतिजा सार्वजनिक भइसकेको छ । मे ४ शनिबार न्युयोर्क समय अनुशार मध्यान्ह १२ बजेदेखि डिभी लोटरीको नतिजा हेर्न सकिने व्यवस्था भइसकेको छ तर कतिपय भने कन्फर्मेशन नम्बर सुरक्षित राख्न नसकेका कारण कसरी डिभी परेको थाहा पाउने अन्यौलमा रहेका छन् ।
डिभी लोटरी परे नपरेको थाहा पाउने एउटामात्र तरिका आधिकारिक वेवसाइटमा गएर कन्फर्मेशन नम्बर हालेर स्टाटस चेक गर्ने हो । कन्फर्मेशन नम्बर, थर र जन्मबर्ष हालेर डिभी परे नपरेको चेक गर्न सकिन्छ । तर कन्फर्मेशन नम्बर हराइहाले पनि चिन्ता गर्नु पर्दैन ।
डिभी लोटरीको कन्फर्मेशन नम्बर हराएको खण्डमा नाम, जन्ममिति र इमेल ठेगाना मार्फत कन्फर्मेशन नम्बर प्राप्त गर्नसकिने सुविधा अमेरिकी सरकारले दिएको छ । हराएको कन्फर्मेशन नम्बर पनि मे ४ पछिमात्रै प्राप्त गर्न सकिन्छ । हराएको कन्फर्मेशन नम्बर प्राप्त गर्न तपाईले डिभी भर्ने बेला जुन इमेल ठेगाना प्रयोग गर्नुभएको थियो त्यही इमेल ठेगाना उल्लेख गर्नुपर्छ ।
डिभीको नतिजा हेर्ने लिंकमा कन्फर्मेशन नम्बर हाल्ने बक्सको तलपट्टी कन्फर्मेशन नम्बर हराएकाहरुले क्लीक गर्ने लिंक उपलब्ध हुन्छ । फर्गट कन्फर्मेशन नम्बरमा क्लीक गरेर कार्यक्रम बर्ष २०२५ छनौट गर्नुपर्छ । त्यसपछि नाम, थर, जन्ममिति र इमेल हालेर कन्फर्मेशन नम्बर प्राप्त गर्न सकिन्छ ।
कन्फर्मेशन नम्बर प्राप्त गर्न यहाँ क्लीक गर्नुहोला ।
तपाईसँग पहिले नै कन्फर्मेशन नम्बर छ वा माथि उल्लेखित विधिबाट इमेलमा कन्फर्मेशन नम्बर प्राप्त गर्नुभयो भने तपाईले आफूलाई डिभी परे नपरेको सहजै हेर्न सक्नुहुनेछ । यदि तपाई डिभीका लागि छनौट हुनुभएन भने तपाई छनौट नहुनुभएको सुचना स्क्रीनमा देख्न सक्नुहुनेछ । यदि तपाई छनौट हुनुभएको खण्डमा त्यसपछिको प्रकृयासहितको पत्र स्क्रीनमा देख्न सक्नुहुनेछ ।