बेलायतको विमानस्थलमा सशस्त्र अमेरिकी अध्यागमन अधिकारीहरु तैनाथ हुने
प्रकाशित मिति : असार २५, २०७४ आईतबार
बेलायतको विमानस्थलमा अमेरिकाका अध्यागमन अधिकारीहरु तैनाथ गर्ने तयारी भइरहेको छ । आयरल्याण्डको डब्लिन र शाननोनमा जस्तै बेलायतहुँदै अमेरिका आउनेहरुलाई पहिले नै बेलायतमा चेकजाँच गर्ने व्यवस्थाका लागि अध्यागमन अधिकारीहरु तैनाथ गर्न लागिएको हो ।
क्यानडा र अबुधाबीमा पनि अमेरिकाको प्रि क्लियरेन्स पोष्ट राखिएको छ । अब बेलायतमा पनि अमेरिकी अध्यागमनको प्रि क्लियरेन्स राख्न लागिएको जनाइएको छ । बेलायतमा चेकजाँच भइसकेपछि भने अमेरिका आइसकेपछि अध्यागमन अधिकारीहरुको चेकजाँच आवश्यक पर्दैन । तर बेलायतबाट अमेरिका आउनेहरुलाई विमानस्थलमा लामो समय लाग्ने भएको छ । बेलायती होम अफिसका प्रवक्ताले यसबारे अमेरिकासँग छलफल भइरहेको जानकारी दिएका छन् ।
कहिलेदेखि बेलायतको विमानस्थलमा अमेरिकी अध्यागमन अधिकारीहरु रहने भन्नेबारे भने केही खुलाइएको छैन । तर हतियारसहितका अध्यागमन अधिकारीहरु बेलायतको विमानस्थलमा राख्दा त्यसको भार एयरलाइन्सहरुलाई पर्ने र एयरलाइन्सको भाडा बढ्नसक्ने जनाइएको छ ।
