निर्वाचन आयोगमा ठूला दलहरुले बुझाए समानुपातिकतर्फका उम्मेदवारको बन्दसूची
प्रकाशित मिति : आश्विन ३, २०७९ सोमबार
आगामी प्रतिनिधिसभा र प्रदेश सभा सदस्य निर्वाचनअन्तर्गत समानुपातिकतर्फको उम्मेदवारको बन्दी सूची बुझाउन दलहरुले निर्वाचन आयोग पुगेर बुझाएका छन् । आगामी प्रतिनिधि तथा प्रदेशसभाको निर्वाचनमा समानुपातिकतर्फका उम्मेदवारको बन्दसूची बुझाउने आज अन्तिम दिन हो ।
सत्तारुढ दल नेपाली कांग्रेसले आसन्न प्रतिनिधि र प्रदेश सभा सदस्य निर्वाचनको समानुपातिक तर्फका उम्मेदवारको बन्द सूची बुझाएको छ । निर्वाचन आयोगमा सोमबार अपरान्ह पुगेर कांग्रेसका महामन्त्री विश्वप्रकाश शर्माले पार्टीको तर्फबाट समानुपातिक तर्फको उम्मेदवारको बन्द सूची बुझाएका हुन् ।
शर्मा भन्छन्, “संविधान दिवसको अवसरमा निर्वाचन आयोगले बनाएको तालिका अनुसार समानुपातिक तर्फको उम्मेदवारी दर्ता गर्न आएका छौं । केही बेर भित्र बसेर नेपाली कांग्रेसको तर्फबाट प्रत्यक्ष र समानुपातिक दुवैको सूचि बनाउँदै गर्दा समानुपातिकतर्फ ११० जनाको र सातै प्रदेशको सूचि नेपाली कांग्रेस संसदीय बोर्डले गरेको निर्णयलाई आजै बसेको केन्द्रिय सम्पादक समितीको बैठकले अनुमोदन गरेर सूचि बुझाएका छौं । आजबाट संविधानले अनुमोदन गरे बमोजिम तपाई हाम्रो चाहाना बमोजिमको लोकतान्त्रिक प्रक्रियाको महान अभियान सुरु भएको छ । प्रतिष्पर्धाकम त गई नै रहेका छौं ।”
त्यस्तै, नेकपा (एमाले)ले पनि प्रतिनिधि र प्रदेशसभातर्फको बन्द सूची निर्वाचन आयोगमा बुझाएको छ । एमालेका तर्फबाट समानुपातिक तर्फको बन्द सूची बुझाउन एमाले निर्वाचन आयोग विभागका उपप्रमुख नीरज आचार्यसहितको टोली आयोग पुगेको हो । उनले भने, ” हामीले सातवटै प्रदेशमा २२० जना प्रदेश सभा र ११० जना प्रतिनिधि सभाको लागि सबै डकुमेन्ट पुरा गरेर आएका छौं ।”
नेकपा (माओवादी केन्द्र)ले पनि आयोजमा बन्दसूची बुझाएको छ । माओवादीकै चुनाव चिह्नमा निर्वाचन लड्न लागेका डा.बाबुराम भट्टराईको पार्टीबाट प्रतिनिधि सभाको समानुपातिकतर्फ ५ सिट पाएको छ । माओवादी केन्द्रका महासचिव देव गुरुङले बाबुरामको पार्टीका प्रतिनिधिसहित प्रतिनिधि सभा ११० जना समानुपातिक सूची आयोगमा बुझाएको जानकारी दिए ।
” नियम अनुसार ११० सिट समनुपातिकतर्फ पठाउनुपर्छ । कानूनले तोकेको क्लस्टर अनुसार पठाउने हो । शीर्ष नेताहरु कता के भन्ने कुरा प्रत्यक्षतर्फको फाईनल भएपछि थाहा हुन्छ ।”- उनले भने ।
नेकपा (एकीकृत समाजवादी) ले आसन्न प्रतिनिधि र प्रदेश सभा सदस्य निर्वाचनको समानुपातिक तर्फका उम्मेदवारको बन्द सूची बुझाएको छ । निर्वाचन आयोगमा सोमबार अपरान्ह पुगेर (एकीकृत समाजवादी)का नेता गंगालाल तुलाधरले पार्टीको तर्फबाट समानुपातिक तर्फको उम्मेदवारको बन्द सूची बुझाएका हुन् ।
उनी भन्छन्, “हामी आफ्नो पार्टीको तर्फबाट उम्मेद्वारी दिन आएका छौ. । राजनीतिक दलहरु लोकतन्त्रमा निर्वाचनका लागी होमिने र उत्साहित हुने भनेको राम्रो कुरा हो । हामीले सात वटै प्रदेश र प्रतिनिधि सभाको निम्ती तयारी गरिरहेका छौं । सात वटै प्रदेशका लागि रकम पनि बुझाईसकेका छौं । हरेक प्रदेशका लागी २५ हजारको दरले दस्तुर बुझाएका छौं ।”
त्यसैगरी, लोकतान्त्रिक समाजवादी पार्टी (लोसपा) पनि बन्दसूची बुझाएको छ । लोसपाले प्रतिनिधिसभामा पुरै ११० र मधेस प्रदेशमा पुरै लिष्ट बुझाए पनि अन्य प्रदेशमा केही कम सूची बुझाउने आयोग पुगेका लोसपा नेता केशव झाले जानकारी दिए ।
उनले भने, “प्रतिनिधि सभातर्फ ११० र प्रदेश सभातर्फ करिब २०० उम्मेदवारको सूची बुझाइएको छ । शीर्ष नेताहरू सबै प्रत्यक्षमा चुनाव लड्नुहुन्छ । प्रदेशसभातर्फ समानुपातिकमा सबै प्रदेशका लागि बन्दसूची बुझाइएको छ ।”
जनता समाजवादी पार्टी (जसपा)ले पनि निर्वाचन आयोगमा समानुपातिकतर्फको बन्दसूची बुझाएका छ । जसपाका अध्यक्ष उपेन्द्र यादव आफै बन्द सुची बोकेर आयोग पुगेका थिए ।
त्यसैगरी, सोमबार राष्ट्रिय जनमोर्चा, नेपाल मजदुर किसान पार्टी (नेमकिपा)ले पनि आसन्न प्रतिनिधि र प्रदेश सभा सदस्य निर्वाचनको समानुपातिक तर्फका उम्मेदवारको बन्द सूची बुझाएको छ । पहिलो दिन आइतबार साना चार दलले मात्रै निर्वाचन आयोगमा सूची बुझाएका थिए । आज आयोगमा बुझाएका र १६ गतेसम्ममा आएका विवरणको जाँचबुझपछि असोज २२ गते आयोगले सार्वजनिक गर्ने आयोगले जनाएको छ ।