‘पहाडमा खान नपुगेर चितवन झरेको म दुईपटक प्रधानमन्त्री बने, आफैलाई सपनाजस्तो लाग्छ’
प्रकाशित मिति : भाद्र २६, २०७९ आईतबार
काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले यूवाहरुलाई सपना देख्न र दृढता राख्न सुझाव दिएका छन् । उनले सपनालाई पुरा गर्न संघर्ष गरिरहनुपर्ने बताउँदै सफलता आफैलाई चुम्न आइपुग्ने बताए । दोस्रो नेपाल युवा उद्यमशीलता शिखर सम्मेलन–२०२२ लाई सम्बोधन गर्दै पहाडमा खान नपुगेर चितवन बसाइसरेको स्मरण गरेका छन् । उनले सामान्य परिवारको मान्छे गणतन्त्र नेपालको दुईपटक प्रधानमन्त्री बन्न सकेको बताउँदै आफैलाई सपनाजस्तो लाग्ने जिकिर गरे ।
उनले भने, ‘सपना बनाउनुहोस्, दृढता राख्नुहोस्, लागि पर्नुहोस् । सफलता तपाइहरुको अगाडी, तपाईहरुलाई चुम्न आइपुग्छ । म पहाडमा खान नपुगरेर चितवन बसाइसरेको हुँ परिवारको एउटा बच्चा दुईपटक त प्रधानमन्त्री भइसके गणतन्त्र नेपालको । कसरी सम्भव भयो भनेर आफैलाई सपना हो कि विपना हो जस्तो लाग्छ ।’
अध्यक्ष प्रचण्डले सामान्य परिवारको व्यक्तिले दुईपटकसम्म मुलुकको गर्न सकेको बताउँदै आफूलाई गौरवशाली लाग्ने धारणा राखे । उनले दश वर्षे युद्धको सुप्रिम कमाण्डरको रुपमा नेतृत्व गरेको स्मरण गर्दे शान्ति सम्झौता मार्फत युद्धलाई शान्तिमा रुपान्तरण गर्न नेतृत्व गर्ने अवसर मिलेको सम्झिए ।
प्रचण्डले भने, ‘म यश अर्थमा बढो आफूलाई गौरवशाली पनि ठान्छु, मैले युद्धको नेतृत्व गरे दश वर्ष । त्यो पनि नेपालको ईतिहासमा कहिल्यै नभएको विद्रोहको रुपमा युद्धको कमाण्ड, सुप्रिम कमाण्डर पनि भए ।’ उनले थपे,- ‘आफैमा यो सबै अवसर प्राप्त गर्न सक्ने कुरा पनि होइन् भएको भए त मलाई कसले छोड्थ्यो र । यस पछि विस्तृत शान्ति सम्झौता मार्फत युद्धलाई शान्तिमा रुपान्तरण गर्नको लागि मलाई नेतृत्व गर्ने अवसर प्राप्त भयो । यो पनि ठूलो युगान्तकारी कुरा हो ।’
उनले ठूला घटनाहरुको नेतृत्व गरेर युगान्तकारी परिवर्तनलाई संस्थागत गर्ने अवसर प्राप्त हुनु गौरवको कुरा रहेको जिकिर गरे । देशको राजनीतिलाई एउटा नयाँ ठाउँमा पुराइसक्ने सपना देखेर अठोट लिएपछि दायाँबायाँ नभएको बताउँदै उद्धेश्यबाट कहिले पनि तलमाथि नभएको उनको भनाई छ ।
‘एउटा व्यक्तिलाई यति ठूला घटनाहरुको नेतृत्व गरेर यत्रो युगान्तकारी परिवर्तनलाई संस्थागत गर्ने अवसर प्राप्त हुनु मेरो लागि धेरै ठूलो गौरवको कुरा हो । म फर्केर हेर्छु, कसरी यस्तो भए होला भन्दा म जतिबेला सपना देखेर यो देशको राजनीतिलाई एउटा नयाँ ठाउँमा पुराइसक्ने अठोट लिएपछि दायाँबायाँ फर्केर हेरिन् । मेरो मुल उद्धेश्यबाट कहिले पनि दायाँबायाँ भएको छैन् ।’- प्रचण्डले भने ।