नेपालमा पिसकोर आएको ६० औं बर्षगाँठ, विष्णुमायाले सुनाइन् पिसकोरले बदलेको जीवन अनुभव
प्रकाशित मिति : भाद्र १७, २०७९ शुक्रबार
पिस कोर नेपालले पिस कोर स्वयंसेवकहरूको पहिलो समूह काठमाडौँ आइपुगेको अवसरको ६० औँ वर्षगाँठ मनाउँदै छ । यसैक्रममा बिहिबार काठमाडौंको मेरियट होटलमा नेपालका लागि अमेरिकी राजदूत र्याण्डी बेरी र पिस कोरका कन्ट्री डाइरेक्टर ट्रोय कोफरोथले ६० औँ वर्षगाँठ मनाउने क्रममा रिसेप्सनको आयोजना समेत गरेका छन् ।
कार्यक्रममा नेपालका लागि अमेरिकी राजदूत र्याण्डी बेरी, पिस कोरका कन्ट्री डाइरेक्टर ट्रोय कोफरोथ, अधिकारकर्मी डा. विष्णुमाया परियार र किसान धन थापाले पिसकोरको योगदान र पिसकोरबारे आफ्नो अनुभव सुनाएका थिए । पिसकोर स्वयंसेवकका कारण परिवारको जीवन बदलिएको थियो भने थापालाई पिसकोर स्वयंसेवकले अर्गानिक खेती सुरु गर्न सहयोग गरेका थिए । कार्यक्रममा अमेरिकी दूतावास काठमाडौंका कूटनीतिक अधिकारीहरु र नेपाल सरकारका प्रतिनिधिहरुको समेत उपस्थीति रहेको थियो ।
डा. परियारले आफ्नो जीवनको यात्राको बारेमा अनुभव सुनाएकी थिइन्, जुन करिब दुई दशकअघि पीस कोर्प्स स्वयंसेवक विज्ञान शिक्षक जोन ब्रुगम्यानको सहयोगबाट परिवर्तन भएको थियो।
गोरखाको विकट क्षेत्र ताक्लुङको गरिब र दलित परिवारमा अपमान र भेदभाव सहदै हुर्किएकी उनले गोरखाको मनकामना विद्यालयमा पढ्ने क्रममा
पिसकोर स्वयंसेवक जोन ब्रुगम्यानलाई भेटेको तथा उनको सहयोगका कारण जीवन परिवर्तन भएको अनुभव परियारले सुनाइन् । सन् १९९२ मा एसएलसी परीक्षा उत्तिर्ण गरेपछि जोन ब्रुगम्यानले ७ सय डलर छात्रबृत्ति पढाएको र उनको सहयोगले आफूलाई उच्च शिक्षा प्राप्त गर्नमात्र नभई जीवनमा सही मार्गमा अगाडि बढ्न प्रेरित गरेको उनले बताइन् ।
सोही प्रेरणाले आफूले सन् १९९८ मा एसोसिएसन अफ दलित वुमेन्स एडभान्समेन्ट अफ नेपाल स्थापना गरेको उनले बताइन् । पिसकोरले बदलेको विष्णुमायाको जीवन र उनको अधिकारकर्मबारे उनको कथा विश्वभरका कलेजका विद्यार्थीहरूका लागि म्याकग्रो हिल प्रकाशन गरेको पुस्तकमा समेत समावेश छ । साथै अमेरिकाको म्यासाचुसेट्समा सात कक्षाको पाठमा समेत उनको बारेमा समावेश गरिएको छ ।
सन् १९६२ यता हजारौं अमेरिकी र नेपालीहरूले दीर्घकालीन परिवर्तनको प्रयास गर्न र विश्व शान्ति अनि मित्रताको प्रवर्द्धन गर्ने पिसकोरको उद्देश्य प्राप्त गर्न हातेमालो गरिसकेको अमेरिकी दूतावास काठमाडौंले जनाएको छ । सन् १९६२ को सेप्टेम्बर महिनामा ७० भन्दा बढी अमेरिकी स्वयंसेवकहरू काठमाडौँ आइपुगेका थिए र उनीहरूले नेपालभर मुख्यतः विद्यालय र कलेजहरूमा सेवा गरी नेपाल र अमेरिकाबिच दिगो सम्बन्धको सृजना गरेका थिए ।
सन् १९६२ देखि झन्डै ४ हजार अमेरिकीहरूले नेपालमा स्वयंसेवक भई सेवा गरेका छन् र शिक्षा, वातावरण, कृषि, प्राकृतिक स्रोतसाधन र आर्थिक विकासलगायत बहुल क्षेत्रका परियोजनाहरू सम्पन्न गरेका छन् । कोभिड १९ महामारीका कारण सन् २०२० को मार्च महिनामा पिस कोर स्वयंसेवकहरूको विश्वव्यापी निष्क्रमण गरिएकोले उनीहरूलाई फिर्ता ल्याउने पिस कोरको योजना रहेको छ ।
पिस कोर विश्व शान्ति तथा मित्रताको उद्देश्यबाट अभिप्रेरित स्वयंसेवक, समुदायका सदस्य, आतिथेय मुलुकका साझेदार र कर्मचारीहरूको एउटा अन्तर्राष्ट्रिय सेवा सञ्जाल हो । विश्वभरका सरकारहरूको आमन्त्रणमा पिस कोर स्वयंसेवकहरू शिक्षा, स्वास्थ्य, वातावरण, कृषि, सामुदायिक आर्थिक विकास र युवा विकासका क्षेत्रमा स्थानीय रूपमा प्राथमिकता निर्धारण गरिएका परियोजनाहरूमा समुदायका सदस्यहरूसँग काम गर्छन् ।
पिस कोर सञ्जालका सदस्यहरूले आफूले गरेको सेवामार्फत स्थानान्तरणीय सिपहरू विकास र अन्तरसांस्कृतिक क्षमताहरू अभिवृद्धि गर्छन् जसले उनीहरूलाई विश्वका नेतृत्वकर्ताको आगामी पुस्ता बन्ने स्थानमा पुर्याउँछ । सन् १९६१ मा अमेरिकी राष्ट्रपति जोन एफ केनेडिले पिस कोरको स्थापना गरेदेखि २ लाख ४० हजारभन्दा बढी अमेरिकीहरूले विश्वभर १४२ मुलुकमा सेवा गरिसकेका छन् ।