विमानस्थलबाट पक्राउ परेका व्यक्तिलाई दिसा गराउँदा एक किलो सुन निस्कियो
प्रकाशित मिति : भाद्र ५, २०७९ आईतबार
त्रिभुवन विमानस्थलबाट राहदानी नम्बर भी ११२२८९० वाहक ३१ वर्षका भारतीय नागरिक राहुल रेमानान पक्राउ परेका छन् । हिजो बिहान दुबईबाट काठमाण्डौ आएका भारतीय नागरिक राहुल रेमानानलाई प्रहरीले शंकास्पद लागेपछि विमानस्थलबाटै पक्राउ गरेको थियो ।
उनलाई विमानस्थल सुरक्षा कार्यालयले शनिबार आगमन गेटबाट पक्राउ गरेको प्रहरी प्रधान कार्यालयको केन्द्रीय समाचार कक्षले जनाएको छ ।
राहुलको गतिविधि शंकास्पद देखिएपछि नियन्त्रणमा लिएर काठमाडौं मेडिकल कलेजमा एक्स–रे गर्दा पेटभित्र शंकास्पद वस्तुको आकृति देखिएको थियो । त्यसक्रममा प्रहरी वृत्त गौशालामा लगेर शौच गराउँदा मलद्वाराबाट बेलनाकारको सुनको चार वटा पोका फेला परेको प्रहरीले जनाएको छ । यस सम्बन्धमा थप अनुसन्धान भइरहेको प्रहरीले जनाएको छ ।