दलहरुका आ–आफ्नै दाबी : यस्ता छन् चुनावी कुरा
प्रकाशित मिति : भाद्र १, २०७९ बुधबार
मंसिर ४ को प्रतिनिधिसभा र प्रदेशसभाको निर्वाचनका लागि राजनीतिक दलहरु चुनावी तयारीमा जुटेका छन् । सत्ता गठबन्धनमा दलहरुबीच सिट बाँडफाँटका लागि मोडालिटी बनाउन निरन्तर छलफल हुदै आएको छ । सत्ता साझेदार दल नेकपा (माओवादी केन्द्र) बाट डा. बाबुराम भट्टराई र वामदेव गौतम चुनाव लड्ने भएपछि गठबन्धनमा यस विषयमा थप छलफल भएको छ ।
पाँच दलीय सत्ता गठबन्धनमा आगामी संघीय निर्वाचनमा सिट बाँडफाँटका बनेको कार्यदलमा निरन्तर छलफल चल्दै आएको छ । प्रधानमन्त्री एवम् नेपाली कांग्रेसका सभापति शेरबहादुर देउवाले छिटोभन्दा छिटो कार्य गर्न कार्यदललाई निर्देशन दिएका छन् । कार्यदलले पनि यही तहमा सहमति जुटाएर नेतृत्व तहमा प्रतिवेदन बुझाउने बताएको छ । यसअघि गठबन्धनको नेतृत्व गरेको कांग्रेसले गत वैशाखमा सम्पन्न भएको स्थानीय तहको निर्वाचनको मतपरिणामलाई आधार बनाउने भन्दै आएपनि मंगलबार बालुवाटारमा बसेको कार्यदल बैठकमा २०७४ साल र गएको स्थानीय तहको निर्वाचन मतपरिणाम दुवैलाई आधार मान्ने सहमति जुट्यो । प्रधानमन्त्री देउवाले गठबन्धनमा अन्याय सिट बाँडफाँटमा अन्याय नहुने बताए । कांग्रेसले स्थानीय जनप्रतिनिधिलाई चुनाव केन्द्रीत दुई दिने अभिमुखीकरण कार्यक्रम ग-यो । कांग्रेसले भदौ १० देखि २४ गतेसम्म देशका ७७ वटै जिल्लामा चुनाव केन्द्रीत कार्यक्रम गर्दैछ ।
सत्ता साझेदार दल नेकपा माओवादी केन्द्रको चुनाव चिन्ह गोलाकारभित्र हसियाँ हथौडाबाट नेपाल समाजवादी पार्टीका अध्यक्ष डा. बाबुराम भट्टराई संघीय निर्वाचन लड्दैछन् । माओवादीबाट अलग भएका भट्टराइले २०७३ सालमा नयाँ शक्ति पार्टी गठन गरेका थिए भने चुनाव चिन्ह आँखाबाठ २०७४ सालको प्रतिनिधिसभा निर्वाचनमा चुनाव जितेका थिए । पूर्व माओवादी नेता भट्टराईले २०६४ सालमा गोरखा क्षेत्र नम्बर २ र २०७० सालमा गोरखा क्षेत्र नम्बर १ बाट चुनाव जितेका थिए ।
पूर्व प्रधानमन्त्री समेत रहेका भट्टराई फेरी पुरानै पार्टी माओवादीको चुनाव चिन्हबाट यो पटक लड्दैछन् । यसैगरी पूर्व एमाले नेता वामदेव गौतम पनि माओवादी केन्द्रकै चुनाव चिन्हबाट आगामी चुनावमा प्रतिस्पर्धा गर्दैछन् । माओवादीको मंगलबार बसेको स्थायी कमिटी बैठकले भट्टराई र गौतमलाई पार्टीको चुनाव चिन्ह प्रदान गर्ने स्वीकृति ग-यो । भट्टराईको नेपाल समाजवादी पार्टी र गौतमको नेकपा एमता राष्ट्रिय अभियान पार्टी माओवादीबाट चुनाव लड्ने विषय सत्ता गठबन्धनमा पनि छलफल भएको छ । यस विषयमा विभिन्न शर्तहरु भएकाले माओवादीको स्थायी कमिटी बैठक बुधबार फेरी बस्ने पापर्टी प्रवक्ता कृष्ण बहादुर महराले जानकारी दिए ।
प्रमुख प्रतिपक्षी दल नेकपा एमाले आगामी निर्वाचनको तयारीमा तीव्र जुटेको छ । एमाले सचेतक विशाल भट्टराईले प्रतिनिधिसभामा एमाले एक्लै लडे ३९ सिट जित्ने दाबी गरेका छन् । उनका अनुसार आगामी निर्वाचनमा समानुपातिसहित एमालेले ८० सिटको हाराहारीमा जित्नेछ । पछिल्लो समय राजधानीमा आयोजित एक कार्यक्रममा उनले १६५ प्रत्यक्ष तर्फमध्ये एमाले ३९ सिट जित्ने र ७० मा कडा प्रतिस्पर्धा हुने बताएका हुन् ।
पछिल्लो समय गठबन्धनका लागि एमाले अध्यक्ष केपी शर्मा ओलीले सकारात्मक अभिव्यक्ति दिएपनि यो पटक वाम गठबन्धनको मौका फुत्किसकेको छ । यो समय नेपाली कांग्रेस वा सत्ता गठबन्धनका दलहरुलाई रोष प्रकट गरेरै समय व्यतित गरे एमाले झनै खस्कने छ । आफ्नै शक्ति र संगठनको बलमा आगामी चुनावी तयारीमा रहेको एमाले प्रतिपक्षमा रहेका साना दलहरुसँग गठबन्धन गर्न सक्नेछ ।
राष्ट्रपति विद्यादेवी भण्डारीले नागरिकता विधेयक फिर्ता गरेकोप्रति मधेसवादी दलहरु असन्तुष्ट छन् । यो प्रकरणमा प्रतिपक्षी दल एमालेको भूमिका खेलेको आरोप राष्ट्रपतिमाथि लागेको छ । एमालेसँग नजिक जस्तो देखिएको महन्थ ठाकुर नेतृत्वको लोकतानित्तक समाजवादी पार्टीले पनि राष्ट्रपतिको यो कदमको आलोचना गरेको छ ।
जसले गर्दा आगामी निर्वाचनमा लोसपा सत्ता गठबन्धनसँग नजिकने र एमालेसँग टाढा हुने सम्भावना थप बढेको देखिन्छ । सत्ता गठबन्धनको पनि आगामी चुनावी रणनीतिका सम्बन्धमा मंगलबार पनि बैठक बस्यो । गठबन्धनको निरन्तर बस्दै आएको कार्यदलको बैठक बुधबार दिउँसो पुनः बस्नेछ । मंसिर ४ गते हुने प्रतिनिधिसभा र प्रदेशसभा निर्वाचनको मिति नजिकिँदै गर्दा राजनीतिक दलहरु त्यसको तयारीका लागि आ–आफ्नै रणनीतिमा छन् ।-एबीसीबाट