मिटरब्याजी पीडितलाई गृहको आग्रह- ‘प्रमाणसहित उजुरी दिनुस्’
प्रकाशित मिति : श्रावण २८, २०७९ शनिबार
काठमाडौं । गृह मन्त्रालयले देशभरका मिटरब्याजी पीडितहरूलाई प्रमाणसहित उजुरी दिन आग्रह गरेको छ । मन्त्रालयले शनिबार एक सूचना जारी गर्दै देशभरका आर्थिक अपराधीहरूलाई कानूनको दायरामा ल्याई कारबाही गर्न मिटरब्याजी पीडितहरूलाई भदौ ५ गते सम्ममा उजुरी दर्ता आग्रह गरेको हो ।
मिटरब्याजी अपराध नियन्त्रणका लागि प्रधानमन्त्रीको निर्देशनमा शुक्रबार गृहमन्त्रीस्तरीय निर्णयबाट मिटरब्याजी अपराध नियन्त्रणका उपायहरू सिफारिस गर्न डा. भीष्मकुमार भूसालको संयोजकत्वमा कार्यदल गठन भएको थियो ।
उक्त कार्यलदलले नवलपरासी पश्चिमको प्रतापपुर र सुस्ता गाउँपालिकाबाट सङ्गठित भई काठमाडौं माइतिघर मण्डला क्षेत्रमा धर्ना दिँदै आएको ‘मिटर ब्याज तथा ठगी विरुद्ध किसान मजदुर सङ्घर्ष समिति’सँग जिल्ला प्रशासन कार्यालय, काठमाडौंका प्रमुख जिल्ला अधिकारी समेत लगाएतको उपस्थितिमा वार्ता पनि गरिसकेको छ ।
देशैभरी मिटरब्याजीको जालो फैलिएको हुनसक्ने अवस्थालाई मध्यनजर गर्दै ती व्यक्तिहरूबाट मिटरब्याजीले गरेका अपराध र शोषणविरूद्ध आ-आफ्नो जिल्ला प्रशासन कार्यालयमा भदौ ५ गतेभित्र प्रमाणसहित उजुरी दर्ता मन्त्रालयले आग्रह गरेको छ ।