इमिग्रेशन अफिसर बाल्टिमोर रेष्टुरेण्टमा पुगेपछि ३० जनाले छाडे काम
युएस इमिग्रेशन एण्ड कस्टम इन्फोर्समेन्टका एकजना अधिकारी रेष्टुरेण्टमा पुगेर कागजपत्र मागेपछि त्यसको भोलिपल्ट बाल्टिमोरको एउटा रेष्टुरेण्टका ३० जनाले एकैपल्ट काम छाडेका छन् । बोटहाउस रेष्टुरेण्टका संचालकले आइसएका एजेण्टको सोधपुछपछि किचनका प्राय सबै कामदारले एकैपल्ट जागिर छाडेको बताएका छन् ।
बोटहाउस क्यान्टका संचालकले ग्राहकका नाममा एक खुल्लापत्र लेख्दै ट्रम्प प्रशासनले हिस्पानिक समुदायलाई लक्ष्यित गरेकोमा आपत्ति जनाएका छन् । ३० जनाले एकैपटक जागिर छाडेपछि अहिले रेष्टुरेण्टमा ३० जना कर्मचारीको अभाव भएको छ । जसका कारण बाँकी कामदारले दोब्बर सिफ्टमा काम गरिरहेका छन् । सबै कामदारले रेष्टुरेण्टको छानविन पास गरेको र सबैजना अमेरिकामा कानुनी रुपमा नै आएको रेष्टुरेण्टका संचालकले जनाएका छन् ।
बोटहाउस रेष्टुरेण्ट सन् २०१४ मा स्थापना गरिएको हो । रेष्टुरेण्टमा पुगेर इमिग्रेशन एण्ड कस्टम इन्फोर्समेन्टका एजेण्टले दुईबर्षयता रेष्टुरेण्टमा काम गरेकाहरुको सुची मागेका थिए । आइसका प्रवक्ताले रोजगारदाताले रोजगारको कानुन पालना गरे नगरेकोबारे छानविनका लागि यसो गरिएको बताएका छन् ।
मिसिसिपीको एउटा एसियन रेष्टुरेण्टहरुमामा गत फरबरीमा आइसले छापा मारेर ५० जनाभन्दा धेरैलाई नियन्त्रणमा लिएको थियो । त्यस्तै गत महिना मिसिगनको एउटा रेष्टुरेण्टमा आइसका एजेण्ट आएर ब्र्रेकफास्ट खाइसकेपछि तीनजना कामदारलाई नियन्त्रणमा लिएका थिए ।
