अमेरिकाबाट २ साता अगाडि आएका दिदीबहिनीको बुबाआमासहित मुस्ताङमा जहाज दुर्घटनामा निधन
प्रकाशित मिति : जेष्ठ १६, २०७९ सोमबार
अमेरिकाबाट विदामा आएका २ दिदीबहिनीको बुबाआमासहित मुस्ताङमा जहाज दुर्घटनामा निधन भएको छ । गोरखाको एकै परिवारका चार जनाको निधन हुनेमा उनीहरु हुन् ।
गोरखाको सहिदलखन गाउँपालिका वडा नम्बर ५ तीनमाने घर भई काठमाडौंको पुतलीसडक बस्दै आएका ५२ वर्षीय गणेशनारायण श्रेष्ठसहित उनका परिवार जहाज दुर्घटनामा परेका हुन्। अमेरिकामा पढ्दै आएका दुई छोरीहरू रोजिना श्रेष्ठ र रविना श्रेष्ठ दुईसाता अगाडि विदामा नेपाल आएका थिए ।
२३ वर्षकी रोजिना, २० वर्षकी रविना, ४८ वर्षकी रश्मी र ५२ बर्षका गणेशनारायणको दुर्घटनामा निधन भएको हो । उनीहरु मुक्तिनाथ दर्शनका लागि जाँदै थिए ।
रोजिना तीन वर्षअघि र रविना एक वर्षअघि पढाइको शिलशिलामा अमेरिका गएका थिए । रोजिनाले पिएचडी गर्दै थिइन् भने रविनाले कम्प्युटर इन्जिनियरिङ पढ्दै थिइन्।
गोरखा तीनमाने स्थायी घर भएका गणेशनारायण २०४३ सालदेखि काठमाडौंको पुतलीसडकमा बस्दै आएका थिए । तारा एयरको ९ एन एइटी जहाजमा उनीहरूसहित २२ जनाको मृत्यु भएको छ ।