पत्रमार्फत भिसाको सोधपुछ बन्द गरेको नेशनल भिसा सेन्टरमा फोनसेवा पनि खारेज
प्रकाशित मिति : जेष्ठ १०, २०७९ मंगलबार
पत्रमार्फत ग्रिनकार्ड लगायतका आप्रवासी भिसा र कामदार लगायतका गैर आप्रवासी भिसा आवेदनको सोधपुछ बन्द गरेको नेशनल भिसा सेन्टरले फोनसेवा पनि खारेज गरेको छ । सन् २०२० को जुन १ बाट पत्रमार्फत हुने सोधपुछ बन्द गरेकोमा सोमबारदेखि लागु हुनेगरी आप्रवासी र गैर आप्रवासी भिसाका सन्दर्भमा फोनबाट हुने सोधपुछ पनि खारेज गरिएको हो ।
चर्को ब्याकलगका कारण सार्वजनिक सोधपुछका फोन लाइन बन्द गरिएको नेशनल भिसा सेन्टरले जनाएको छ । यसबाट सेवाग्राहीमा पर्न गएको असुविधाप्रति नेशनल भिसा सेन्टरले क्षमा मागेको छ ।
नेशनल भिसा सेन्टरमा आप्रवासी भिसा कसरी अगाडि बढाउने भन्नेबारे थाहा पाउन यहाँ क्लीक गर्नुहोला ।
नेशनल भिसा सेन्टरमा गैर आप्रवासी भिसा कसरी अगाडि बढाउने भन्नेबारे थाहा पाउन यहाँ क्लीक गर्नुहोला ।
सार्वजनिक सोधपुछ टेलिफोन लाइनहरू निलम्बनले राष्ट्रिय भिसा केन्द्रको कुनै पनि आवश्यक कार्यहरूमा बाधा नपुग्ने नेशनल भिसा सेन्टरले स्पष्ट पारेको छ । सेवाग्राहीले अनलाइनमा सोधपुछ फर्म भरेर वा अन्य उल्लेखित तरिकाबाट सम्पर्क गर्न र सोधपुछ गर्न भने सक्नेछन् ।
अनलाइनबाट सोधपुछका लागि यहाँ क्लीक गर्नुहोला ।
सन् २०२० मा नेशनल भिसा सेन्टरले सेवालाई आधुनिकिकरण गर्ने भन्दै हुलाकी पत्रमार्फत हुने सोधपुछ बन्द गरेको थियो । सन् २०२० को जुन १ पछि प्राप्त गरेका पत्रहरुको नेशनल भिसा सेन्टरले कुनै जवाफ नदिई त्यस्ता पत्रहरु नष्ट गर्दै आएको छ । यद्यपी नेशनल भिसा सेन्टरले कुनै विषयमा पत्र पठाउन जानकारी गराएको खण्डमा भने पत्रमार्फत सम्पर्क पनि गर्न सकिनेछ ।
धेरै जसो केसहरूमा कागजातको लागि यो अनुरोध केबल इलेक्ट्रोनिक रूपमा प्रशोधन नभएको आवेदनका सन्दर्भमा हुनेछ । सेवाग्राहीको आवेदनका लागि आवश्यक भएमा नेशनल भिसा सेन्टरले तपाईलाई हुलाकबाट पत्र पठाउने ठेगाना प्रदान गर्नेछ। नेशनल भिसा सेन्टरमा ओरिजिनल कागजातहरु नपठाउन सुझाव दिइएको छ ।