सुन्दर नेपालमा आउन पाउँदा उत्साहित छु: अमेरिकी उपविदेशमन्त्री उजरा जेया
प्रकाशित मिति : जेष्ठ ६, २०७९ शुक्रबार
तिब्बत मामलामा विशेष संयोजक रहेकी नागरिक सुरक्षा, लोकतन्त्र र मानव अधिकारका लागि अमेरिकी उपविदेशमन्त्री उजरा जेयाले नेपाल आएलगत्तै सुन्दर नेपालमा आउन पाउँदा उत्साहित भएको बताएकी छिन् । उनले नेपाल आउनेबित्तिकै ट्वीट गर्दै सबैका लागि प्रजातन्त्र र मानव अधिकारको विकाशमा अमेरिका र नेपालबीचको बलियो साझेदारीका विषयमा छलफल गर्न नेपाल आउन पाउँदा उत्साहित भएको बताएकी हुन् ।
जेयालाई स्वागत गर्न अमेरिकी दूतावासका अधिकारीहरु र नेपालको परराष्ट्र मन्त्रालयका अधिकारीहरु विमानस्थल पुगेका थिए । स्वागत पछि नेपालका लागि अमेरिकी राजदूत र्याण्डी बेरीले ट्वीट गर्दै जेयालाई नेपालमा पाएकोमा र सुन्दर नेपाल देखाउन पाएकोमा रोमाञ्चि भएको बताएका छन् । उनले भनेका छन् – ‘अमेरिकी उपविदेशमन्त्री उजरा जेयालाई नेपालमा हार्दिक स्वागत छ।’
जेया आज दिउसो युएसएआईडीका एसियाका लागि कार्यवाहक सहायक प्रशासक अन्जली कौर सहित आइपुगेकी हुन् । शनिबार उनले प्रधानमन्त्री, परराष्ट्रमन्त्री लगायत राजनीतिक दलका उच्च नेतृत्वलाई भेट्ने कार्यक्रम तय भएको छ ।
यसैबीच अमेरिकी दूतावास काठमाडौंले सामाजिक सञ्जालमार्फत भनेको छ -‘नागरिक सुरक्षा, लोकतन्त्र तथा मानव अधिकार सम्बन्धी अमेरिकी उपविदेशमन्त्री उजरा जेयालाई नेपालमा हार्दिक स्वागत छ। आफ्नो तीन दिने भ्रमणका क्रममा उपविदेशमन्त्री जेयाले मानव अधिकार र लोकतन्त्रप्रति नेपालको प्रतिवद्धताको लागि अमेरिकी सहयोगको विषयमा छलफल र कुराकानी गर्नुहुनेछ।’
मानवअधिकार र लोकतान्त्रिक शासनका लक्ष्यमा सहयोग गहिरो बनाउन र मानवीय प्राथमिकतालाई अगाडि बढाउन उनको भ्रमण फलदायी हुने अमेरिकी विदेश मन्त्रालयले विश्वास लिएको छ । उनले लोकतन्त्रका लागि शिखर सम्मेलनका लागि नेपालसँग सहकार्य गर्ने विषयमा समेत छलफल गर्नेछिन् ।
यो भ्रमण मानवअधिकारका प्राथमिकतालाई अगाडि बढाउनमा केन्द्रीत रहेको समेत विदेश मन्त्रालयका प्रवक्ताले खसोखासलाई जानकारी दिएका छन् । भारतको धर्मशालास्थीत तिब्बती धर्मगुरु दलाई लामासँगका भेटवार्तासहितका कार्यक्रम सकेर उनी नेपाल आएकी हुन् । उनी आइतबार फर्कनेछिन् ।
नेपाल र अमेरिकाको कूटनीतिक सम्बन्ध स्थापनाको ७५ बर्ष पुगेको अवशरमा यो भ्रमण आयोजना गरिएको हो । विगतमा अमेरिकी उच्च अधिकारीहरुले नेपाल भ्रमण गरेपनि यो स्तरको भ्रमण भने १० बर्षपछि भएको हो ।
सन् २०१२ मा अमेरिकी उपविदेशमन्त्रीहरु वेन्डी शम्र्यान र मारिया ओटेरोले नेपालको भ्रमण गरेका थिए । अमेरिकी विदेशमन्त्रालयमा उपविदेशमन्त्री तेश्रो उच्च पद हो । उपविदेशमन्त्री पद अमेरिकी विदेशमन्त्री र कार्यवाहक विदेशमन्त्रीपछिको तथा सहायक विदेशमन्त्रीभन्दा माथिको उच्च पद हो ।
यसै महिनाको सुरुमा एमसीसीका नायव उपाध्यक्ष जोनाथन ब्रुक्सले नेपाल भ्रमण गरेका थिए । उनले नेपालका अधिकारीहरुसँग भेटेर एमसीसी अन्तर्गतका परियोजना कार्यान्वयन अवस्थाबारे छलफल गरेका थिए ।
गतमहिना अमेरिकाका पाँच सांसदले नेपाल भ्रमण गरेका थिए । उक्त सांसद टोली आउनु चार दिनअघि अमेरिकी उपसहायकमन्त्री केली केडरलिङ काठमाडौंमै थिइन्।