युएससीआईएसका सबै सर्भिस सेन्टरमा प्राय सबै आवेदन शुल्क क्रेडिट कार्डबाट तिर्न सकिने
प्रकाशित मिति : चैत्र २४, २०७८ बिहीबार
अब युएससीआईएसका सबै सर्भिस सेन्टरहरुमा दिइने प्राय सबै अध्यागमनका आवेदनहरुमा शुल्क क्रेडिट कार्डबाट तिर्न सकिने भएको छ । सबै सर्भिस सेन्टरहरुले क्रेडिट कार्ड प्रयोग गरेर डिजिटल पेमेन्ट स्वीकार गर्ने दिशामा अगाडि बढाउन यो मुख्य कार्यक्रम अगाडि सारिएको थियो । अब युएससीआईएसको लकबक्स र सर्भिस सेन्टरमा फाइल गरिने आवेदनको शुल्क क्रेडिट कार्डबाट तिर्न सकिन्छ ।
क्रेडिट कार्डबाट रकम बुझाउदा आवेदनका साथमा क्रेडिट कार्ड प्रयोगका लागि स्वीकृति दिने आवेदन जी १४५० फर्म समेत एकैसाथ भरेर पठाउनुपर्छ । उक्त फर्ममा क्रेडिट कार्डको विवरण उल्लेख गरेर पठाउनुपर्छ ।
अमेरिकी बैंकबाट जारी क्रेडिटकार्डबाट रकम तिर्न सकिनेछ भने क्रेडिट कार्डबाट रकम तिर्दा युएससीआईएसले अतिरिक्त शुल्क नलिने जनाएको छ । विदेशी बैंकले जारी गरेको क्रेडिट कार्ड भने स्वीकार नगर्ने युएससीआईएसले स्पष्ट पारेको छ ।
क्रेडिट कार्डबाट रकम तिर्नसकिने कार्यक्रम गतबर्ष मे ३ मा नेब्रास्का सर्भिस सेन्टरमा सुरु गरिएको थियो । सुरुमा यु भिसाका ग्रिनकार्ड आवेदन आई ४८५ का लागि स्वीकार गरिएपनि पछि जुलाई १९ बाट नेब्रास्का सर्भिस सेन्टरमा अन्य आवेदनका सन्दर्भमा पनि विस्तार गरिएको थियो ।
क्रेडिट कार्डबाट रकम तिर्दा कुनै कारणवश पहिलोपटक ट्रान्जेक्सन अस्वीकृत भएमा युएससीआईएसले दोश्रोपटक प्रयास गर्दैन । जसका कारण कुनै प्राविधिक कारण वा युएससीआईएसकै गल्तीले ट्रान्जेक्सन स्वीकृत नभएको खण्डमा समेत आवेदन फिर्ता आउने गरेको गुनासो सेवाग्राहीहरुको रहेको छ ।
लकबक्समा फाइल गरेका आवेदनका सन्दर्भमा भने क्रेडिट कार्डबाट पेमेन्ट गर्न सकिने सुविधा पहिलेदेखि नै रहदै आएको छ ।