२ बर्षे ग्रिनकार्ड लिएकाले १० बर्षे ग्रिनकार्ड आवेदन दिंदा अब सबैलाई अन्तरवार्ता अनिवार्य नगरिने
प्रकाशित मिति : चैत्र २४, २०७८ बिहीबार
शर्तसहितको २ बर्षे ग्रिनकार्ड लिएकाहरुलाई शर्त हटाएर १० बर्षे ग्रिनकार्ड दिने क्रममा अब सबै आवेदकलाई युएससीआईएसले अन्तरवार्ता अनिवार्य नगर्ने भएको छ । अहिलेसम्म दूतावासबाट आप्रवासी भिसा लिएर आउने शर्तसहितको २ बर्षे ग्रिनकार्ड वाहकलाई शर्त हटाएर १० बर्षे ग्रिनकार्ड प्रदान गर्ने क्रममा अन्तरवार्ता अनिवार्य गरिदै आएको थियो ।
तत्कालदेखि लागु हुनेगरी अन्तरवार्ता छुटका सन्दर्भमा नयाँ मापदण्ड लागु गरिएको युएससीआईएसले प्रष्ट पारेको छ । ग्रिनकार्डको शर्त हटाउनका लागि दिएको आई ७५१ आवेदनका सन्दर्भमा अन्तरवार्ता छुट दिने विषयमा अब जोखिममा आधारित दृष्टिकोण लागु गरिने युएससीआईएसले जनाएको हो । नयाँ मापदण्डमा कस्तो अवस्थामा अन्तरवार्ता छुट दिइने भन्नेबारे प्रष्ट पारिएको छ ।
नयाँ रणनीतिले आवेदनको प्रकृयामा लाग्ने समयमा सुधार हुनुका साथै युएससीआईएसको जनशक्तिको उचित र प्रभावकारी प्रयोग हुने विश्वास युएससीआईएसको रहेको छ । जालसाजीको पहिचान र राष्ट्रिय सुरक्षाको संरक्षणको प्रकृया जारी रहने भएपनि नयाँ रणनीतिले ब्याकलक पनि कम हुने अपेक्षा गरिएको छ ।
सामान्यतया अमेरिकी नागरिक वा ग्रिनकार्डवाहकसँग विवाह भएको दुईबर्षभित्र पूरा नभएको अवस्थामा दम्पत्तिले ग्रिनकार्डका लागि आवेदन दिएको खण्डमा २ बर्षको शर्तसहितको ग्रिनकार्ड प्रदान गरिन्छ । उक्त ग्रिनकार्डको २ बर्ष पूरा हुनुभन्दा ९० दिनभित्र शर्त हटाएर पूर्ण ग्रिनकार्ड प्राप्त गर्नका लागि शर्त हटाउने आई ७५१ आवेदन दिनुपर्छ ।
विगतमा अन्तरवार्ता अनिवार्य गरिंदा युएससीआईएसको जनशक्तिको उचित र प्रभावकारी सदुपयोग भएको प्रमाणित नभएको युएससीआईएसले जनाएको छ । अब विवाह वास्तविक भएको, संयुक्त फाइलिङको आवश्यकता छुटको लागि योग्य भएको, जालसाजीको कुनै संकेत नभएको, अपराधको पृष्ठभूमि नभएको र कुनै समाधान गर्नुपर्ने जटिल तथ्य नभएको अवस्थामा शर्त हटाउने क्रममा युएससीआईएसले अन्तरवार्ता छुट दिन सक्नेछ ।