अर्को महिनादेखि भिसा सुविधामा स्थलमार्गबाट अमेरिका आउनेले कागजी फर्म भर्नु नपर्ने
प्रकाशित मिति : चैत्र १८, २०७८ शुक्रबार
अर्को महिनादेखि भिसा सुविधामा स्थलमार्गबाट अमेरिका आउने आप्रवासीहरुले आई ९४ डब्ल्यु नामको कागजी फर्म भर्नु नपर्ने भएको छ । सीबीपीको अन्तरिम अन्तिम नियम अनुशार उनीहरुले पनि अनलाइनमार्फत यात्रा अनुमतिका लागि विद्युतीय प्रणालीमार्फत विवरण बुझाउनुपर्नेछ ।
यसबारेको नियम आज फेडरल रजिष्टरमा प्रकाशित भएको छ । यो नियम मे २ देखि लागु हुनेछ । ३० दिनसम्म यो नियमबारे कमेन्ट गर्न सकिने समेत जनाइएको छ । अमेरिका आउनका लागि भिसा स्टीकर नचाहिने देशका नागरिकहरुका लागिमात्र यो नियम लागु हुनेछ ।
अमेरिकामा ४० देशका नागरिकलाई घुमफिरका लागि आउन दूतावासबाट भिसा लिनु पर्दैन । उनीहरु बी श्रेणीको भिसा नलिइकनै ९० दिनसम्म अमेरिकामा भ्रमण गर्न सक्छन् । तर अनलाइनमार्फत यात्रा अनुमतिका लागि आवेदन दिएर स्वीकृत भइसकेपछिमात्र उनीहरु अमेरिका प्रवेश गर्न सक्छन् । अन्यथा उनीहरुले भिसा लिएरमात्र अमेरिका आउनुपर्छ ।
अहिलेसम्म भिसा सुविधाप्राप्त देशहरु स्थलमार्गबाट अमेरिका प्रवेश गर्दा सीबीपीलाई बायोग्राफिक र यात्राबारेको सुचना प्रदान गर्ने कागजी फर्म भर्नुपर्ने व्यवस्था रहेको छ । सीबीपीले हवाई र जलमार्गबाट अमेरिका आउनेहरुका लागि अनलाइनबाटै यात्रा अनुमति फर्म भर्नुपर्ने व्यवस्था पहिले देखि नै लागु गरिरहेको छ । सन् २००८ को नुन ९ मा नै यसबारे नियम प्रकाशित गरिएको थियो ।
अमेरिकामा आउनुभन्दा ७२ घण्टा अगाडि नै अनलाइनमार्फत यात्रा अनुमतिका लागि आवेदन दिन सुझाव दिइएको छ । अनलाइनमार्फत विवरण पेश गरेर अमेरिका आउँदा सिमाक्षेत्रमा प्रकृया पनि छिटो हुने अपेक्षा गरिएको छ । सन् २०१३ देखि २०१७ सम्म अमेरिकामा ४० लाख व्यक्ति स्थलमार्गबाट भिसा सुविधा कार्यक्रम अन्तरगत प्रवेश गरेका थिए । जसमध्ये शुन्य दशमलव १ प्रतिशत व्यक्तिलाई प्रवेशको अनुमति दिइएको थिएन ।