विशेष अनुसन्धानको दायरामा राष्ट्रपति ट्रम्प
प्रकाशित मिति : असार १, २०७४ बिहीबार
आज जुन १४ । अमेरिकी राष्ट्रपति डोनाल्ड ट्रम्प आजबाट ७१ बर्षमा पुगेका छन् । सन् १९४६ को जुन १४ मा जन्मिएका ट्रम्पको जन्मदिनमा उनीमाथि विशेष अनुसन्धान थालिएको खबर सार्वजनिक भएको छ ।
ट्रम्पले न्यायमा पुर्याएको सम्भावित बाधाबारे विशेष अभियोक्ता रोबर्ट मुलरले अनुसन्धान थालेको जनाइएको छ । राष्ट्रपति चुनावमा रुसको चलखेलबारे अनुसन्धान गर्न मुलरलाई अमेरिकी न्याय मन्त्रालयले विशेष अधिकारसहित गत मे १७ मा नियुक्त गरेको थियो ।
मुलरले यसअगाडि एफबीआईको निर्देशकका रुपमा काम गरेका थिए ।
वासिंटन पोष्टले गोप्य श्रोतलाई उद्धृत गर्दै नेशनल इन्टेलिजेन्सका डाइरेक्टर डान कोट्स, नेशनल सेक्युरिटी एजेन्सीका प्रमुख माइक रोजर्स, एनएसएका पूर्व कार्यकारी निर्देशक रिचार्ड लेजेटले मुलरका अनुसन्धानकर्ताहरुलाई अन्तरवार्ता दिन सहमति जनाएका छन् । राष्ट्रपति ट्रम्पले एफबीआई निर्देशक जेम्स कोमेलाई बर्खास्त गरेको भोलिपल्टदेखि नै ट्रम्पमाथि अनुसन्धान थालिएको जनाइएको छ ।
अनुसन्धान थालिएको रिपोर्ट वासिंटन पोष्टमा प्रकाशित हुनासाथ ट्रम्पका नीजि वकिलका प्रवक्ताले त्यसको निन्दा गरेका छन् । राष्ट्रपतिको सन्दर्भमा एफबीआईबाट चुहिएको सुचना अपमानजनक, अक्षम्य र गैरकानुनी रहेको उनले बताएका छन् ।
राष्ट्रपतिले आपराधिक अभियोगको सामना गर्नुपर्ने नभएपनि न्यायमा बाधा पुर्याएको पुष्टी भएमा त्यो महाअभियोगका लागि थप आधार हुनसक्ने जनाइएको छ । तर ट्रम्प समर्थक रिपब्लिकनको बहुमत रहेको प्रतिनिधिसभाबाट त्यस्तो महाअभियोग प्रस्ताव स्वीकृत हुनमा भने जटिलता नै छ ।