लण्डनको ल्याटिमेर रोड टावर ब्लकमा भीषण आगलागी
प्रकाशित मिति : जेष्ठ ३१, २०७४ बुधबार
वेस्ट लण्डनको ल्याटिमेर रोडस्थित टावर ब्लकमा भीषण आगलागी भएको छ । भवनभित्र कैयन मानिसहरु थुनिएको प्रत्यक्षदर्शीले बताएका छन्।ल्याङकेस्टर वेस्ट स्टेटको ग्रेनफेल टावरमा स्थानीय समय अनुसार राति १ बजेर १६ मिनेट जाँदा आगलागी सुरु भएको थियो।
झण्डै २०० सय अग्नि नियन्त्रकले आगो नियन्त्रणमा लिने प्रयास गरिरहेका छन्। घटनामा कैयन घाइते भएको र उनीहरुको उपचार भइरहेको जनाइएको छ । पूरै भवन जलिरहेको छ भने भवन लड्न सक्ने देखिएको छ । भवनको भित्री भागसम्म आगो फैलिएको छ भने पूरै भवन नै हल्लिरहेको छ ।
लण्डनका मेयर सादिक खानले घटनालाई एउटा मुख्य घटनाको संज्ञा दिएका छन् । भवनको माथिल्लो तल्लामा आगोको लप्का पुग्दै गर्दा त्यहाँभित्रबाट टर्च लाइट बालेको दृश्य देखिएको प्रत्यक्षदर्शीहरुले बताएका छन् ।
आगलागीको कारण अज्ञात रहेको अधिकारीहरुले बताएका छन् । कुनै व्यक्ति भित्र थुनिएको बारे आफूले कुनै जानकारी नपाएको अधिकारीहरुको भनाई छ । तर धुँवाबाट निसासिएका १५ जनाको उपचार भइरहेको अधिकारीहरुले बताएका छन् । आगलागीपछि भवनभित्रका कैयन व्यक्ति विना चप्पल, रातीको कपडामा रुदै कराउँदै सडकमा निस्किएका थिए ।