Follow @khasokhasmag

यो बर्ष अहिलेसम्मकै धेरै झण्डै ३ लाखलाई रोजगारमा आधारित ग्रिनकार्ड दिने युएससीआईएसको लक्ष्य


प्रकाशित मिति : माघ ८, २०७८ शनिबार

यो बर्षका रोजगारमा आधारित सबै ग्रिनकार्ड प्रयोग गर्न आफूहरु प्रतिवद्ध रहेको युएससीआईएसले जनाएको छ । अमेरिकी विदेश मन्त्रालयसँगको सहकार्यमा रोजागारमा आधारित सबै ग्रिनकार्डहरु प्रयोग गर्न आफूहरु प्रतिवद्ध रहेको युएससीआईएसको भनाई छ ।

रोजगारमा आधारित आप्रवासी भिसा र ग्रिनकार्डका लागि योग्यलाई आवेदन दिन युएससीआईएसले प्रोत्साहन गरेको छ । चालु आर्थिक बर्षको ग्रिनकार्डको कोटा आगामी सेप्टेम्बरभित्र प्रयोग गरिसक्नुपर्ने प्रावधान रहेको छ । गत आर्थिक बर्षमा कोरोनाको महामारीका कारण रोजगारमा आधारित ग्रिनकार्डका सबै कोटा प्रयोग भएका थिएनन् । जसका कारण चालु आर्थिक बर्षका लागि उपलब्ध ग्रिनकार्डको कोटा अत्यन्तै उच्च रहेको छ ।

हरेक बर्ष १ लाख ४० हजार रोजगारमा आधारित ग्रिनकार्डहरु उपलब्ध हुने भएतापनि गत आर्थिक बर्षमा कोरोना महामारीका कारण पूरै संख्या प्रयोग नहुँदा यो बर्षका लागि रोजगारमा आधारित ग्रिनकार्डको कोटा २ लाख ९० हजार भन्दा धेरै रहेको छ । गत आर्थिक बर्षमा १ लाख २२ हजारभन्दा धेरै थप रोजगारमा आधारित ग्रिनकार्डहरु उपलब्ध रहेकोमा नियमित १ लाख ४० हजार जोड्दा २ लाख ६२ हजारभन्दा धेरै रोजगारमा आधारित ग्रिनकार्डहरु उपलब्ध रहेका थिए ।

रोजागरमा आधारित ग्रिनकार्डहरु पाँचवटा श्रेणीमा उपलब्ध हुदै आएका छन् । जसमध्ये सबैभन्दा धेरै ईबी वान, ईबी टु र ईबी थ्री श्रेणीका ग्रिनकार्डहरु प्रयोग हुँदै आएका छन् । पहिलो श्रेणी ईबी वानमा विज्ञान, कला, शिक्षा, व्यापार, वा एथलेटिक्समा असाधारण क्षमता भएका विदेशीहरू, उत्कृष्ट प्रोफेसर र शोधकर्ताहरू वा निश्चित बहुराष्ट्रिय प्रबन्धक र कार्यकारीहरू पर्छन् । यो श्रेणीमा जागिरको अफर र लेबर सर्टिफिकेशन आवश्यक नपर्ने भएकाले रोजगारदाता विना नै आफै वा वकिलको सहायतामा आवेदन दिन सकिन्छ ।

ईबी टु श्रेणीमा एड्भान्स डिग्री भएका पेशाकर्मीहरु वा सदस्य हुन् वा विशिष्ट क्षमता भएकाहरु पर्छन् । यो श्रेणीमा जागिरको अफर विना र लेबर सर्टिफिकेशन विना आवेदन दिनका लागि राष्ट्रिय रुचीका छुटका लागि आवेदन दिन सकिन्छ । त्यस्तो छुट पाउनेहरुले रोजगारदाता विना नै आफै वा वकिलको सहायतामा आवेदन दिन सकिन्छ । छुट नपाउनेहरुलाई रोजगारदाताका तर्फबाट जागिरको अफर र लेबर सर्टिफिकेशन सहित फाइल गर्नुपर्छ ।

ईबी थ्री श्रेणीमा दक्ष कामदारहरू, पेशेवरहरू, वा अन्य कामदारहरू पर्छन् । यो श्रेणीको ग्रिनकार्ड रोजगारदाताले फाइल गर्नुपर्छ भने जागिरको अफर र लेबर सर्टिफिकेशन आवश्यक पर्छ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com